StarCraft hátíð var haldin um helgina í rafíþróttamiðstöðinni Next Level Gaming í Egilshöll þar sem tugir aðdáenda klassíska herkænskuleiksins komu saman til að spila, keppa og hitta gamla spilafélaga.
Viðburðurinn var haldinn í tilefni þess að 28 ár eru liðin frá útgáfu upprunalega leiksins og markaði jafnframt skemmtilegan endurfund margra sem hafa fylgt seríunni í gegnum árin.
Krýndir Íslandsmeistarar í tveimur leikjum
Í mótinu var keppt í bæði StarCraft og StarCraft II þar sem sigurvegarar hlutu verðlaunabikar og þar með formlegan titil Íslandsmeistara í hvorum leik.
Bjarni Ólafsson, sem spilar undir nafninu Steamy, sigraði í StarCraft en Þórgeir Atli, betur þekktur sem Dodi, stóð uppi sem Íslandsmeistari í StarCraft II. Úrslitaeinvígin voru sýnd á stórum skjá í salnum þar sem áhorfendur fylgdust spenntir með gangi mála.
Við verðlaunaafhendingu var síðan heiðraður gamall siður úr kóreskum StarCraft keppnum þegar sigurvegararnir kysstu bikarinn.
Að sögn skipuleggjenda gekk viðburðurinn afar vel þrátt fyrir smávægilega byrjunarörðugleika.
„Á heildina litið gekk þetta mjög vel, þó að við höfum lent í smá tæknilegum erfiðleikum í upphafi. Sem betur fer leystist það fljótt og stemningin var frábær allan daginn,“
segja skipuleggjendur í samtali við esports.is.
Aldursbilið vakti athygli gesta
Keppendur komu af öllum getustigum, allt frá fyrrverandi atvinnumönnum í rafíþróttum til byrjenda sem voru að taka sín fyrstu skref í keppnisspilun.
Yngsti þátttakandinn var um tólf ára gamall en sá elsti á fimmtugsaldri. Sérstaklega vakti athygli skemmtideild í StarCraft sem var ætluð þeim sem vildu spila án þess að mæta sterkustu keppendunum. Þar voru margir spennandi leikir og greinilegt að þátttakendur bættu sig með hverjum leiknum.
Lýsandi fenginn frá Bandaríkjunum
Úrslitaleikirnir fengu einnig sérstaka umgjörð. Fyrir StarCraft var fenginn lýsandi frá Bandaríkjunum sem lýsti leikjunum í gegnum streymi sem síðan var spilað í salnum. Í StarCraft II komu lýsendurnir hins vegar úr röðum hátíðargesta sjálfra.
Aðsókn var góð yfir daginn og mættu um fjörutíu manns á viðburðinn. Flestir komu til að spila en einnig litu margir við til að fylgjast með leikjunum og hitta aðra áhugamenn um StarCraft. Sumir lögðu jafnvel langa leið að baki til að taka þátt.
„Það var greinilegt að uppsafnaður áhugi var fyrir svona viðburði og svo góð stemning myndaðist meðal gesta að við erum þegar farin að leggja á ráðin um að endurtaka og efla hátíðina að ári,“
segja skipuleggjendur.
Meðfylgjandi myndir tók Þorsteinn Jónas Sigurbjörnsson.
