Rafíþróttasamfélagið á Íslandi hittist á ný, eftir gott sumarfrí, til baráttu þegar PUBG scrim mót fór fram í gær sunnudaginn 17. ágúst. Þátttakan var ókeypis og skráðu sig alls 15 lið til leiks. Þar mátti sjá bæði þekkt nöfn úr íslensku PUBG-senunni og nýliða sem reyndu með sér í harðri samkeppni.
Eftir sex leiki stóðu leikmenn OMNI uppi sem sigurvegarar með samtals 71 stig. Í öðru sæti endaði Agent000 með 65 stig, og í þriðja sæti lenti Fresh með 54 stig. NLG Red og Hraunbitar fylgdu fast á eftir í fjórða og fimmta sæti.
Lið eins og Hlandblettur, Hot Drop og Trudapestin héldu sér einnig vel í baráttunni og sköpuðu spennu fram á síðustu mínútur. Þá voru einnig lið á borð við Team Iceland, NIC Cage Fan Club og HYPE sem tóku þátt og settu svip sinn á mótið.
Þrátt fyrir að scrim sé æfingamót sýndi það enn á ný styrk íslenska PUBG samfélagsins, sem heldur áfram að eflast með reglulegum viðburðum.
Scrimið var haldið í aðdraganda væntanlegrar deildarkeppni sem hefst í lok mánaðarins og lofar góðu um spennandi mánuði fram undan.
Dagsetningar deildarkeppninnar:
31. ágúst kl. 20:00 – 6 leikir
21. september kl. 20:00 – 6 leikir
12. október kl. 20:00 – 6 leikir
2. nóvember kl. 20:00 – 6 leikir
Hvert kvöld er sjálfstætt mót, þannig að lið geta valið frjálst hvort þau taki þátt í einu kvöldi, tveimur, þremur eða öllum fjórum. Verðlaun verða veitt fyrir hvern keppnisdag og verða þau kynnt síðar.
Stigagjöf og úrslit deildarkeppninnar:
Stig verða reiknuð út frá lokasæti liða hvert kvöld og telja bæði til deildarmeistaratitilsins og í heildarstigatöflu keppninnar. Heildarstigataflan ræður því hvaða 16 efstu lið tryggja sér sæti í úrslitum og Íslandsmótinu sem fer fram 6. og 7. desember, báða dagana klukkan 20:00 með sex leikjum hvorn dag.
Ef einhverjar spurningar vakna er hægt að hafa samband við stjórnendur í Facebook-hópnum: Íslenska PUBG samfélagið.
