Leikjaframleiðandinn Rockstar Games, sem stendur á bak við væntanlegan stórleik Grand Theft Auto 6, hefur verið sakaður um brot á verkalýðslögum og svonefnt union-busting, eftir að fyrirtækið lét frá sér fara á bilinu 30 til 40 starfsmenn. Samkvæmt heimildum Bloomberg voru allir starfsmennirnir sagðir tengjast stofnun stéttarfélags innan fyrirtækisins, eða hafa tekið þátt í undirbúningi þess.
Rockstar hefur hins vegar haldið því fram að um hafi verið að ræða „alvarlegt agabrot“ og að engar aðrar ástæður hafi legið að baki uppsögnunum. Talsmaður móðurfyrirtækisins Take-Two Interactive, Alan Lewis, sagði við Bloomberg að fyrirtækið „styddi að fullu við markmið og stefnu í rekstri Rockstar.“
Forseti Independent Workers Union of Great Britain (IWGB), Alex Marshall, gagnrýndi ákvörðunina harðlega og sagði hana „eina grófustu og miskunnarlausustu atlögu gegn verkalýðshreyfingu í sögu leikjaiðnaðarins.“
„Þessi augljósi dónaskapur gagnvart lögum og lífi starfsmanna sem skapa milljarða dollara í tekjur er móðgun við aðdáendur leikjanna og allan iðnaðinn,“
sagði Alex.
Rockstar hefur ekki tjáð sig opinberlega um málið eða gagnrýni IWGB.
Mynd: rockstargames.com
