Tæknin á bakvið HRinginn: „Þessi HRingur verður besti HRingurinn, sennilega frá upphafi“

Undirbúningur fyrir eitt stærsta LAN-mót Íslands, HRinginn, er nú í fullum gangi. Mótið fer fram í Háskóla Reykjavíkur dagana 7. til 9. ágúst og skráning hefst 1. apríl næstkomandi á vefnum hringurinn.net.

Á bakvið uppsetningu mótsins standa meðal annars vinirnir Orri og Hilmar, rafiðnfræðingar sem starfa við rafvirkjun og gegna lykilhlutverki í framkvæmd viðburðarins, ásamt öflugum hópi fólks með sérþekkingu á sínu sviði sem leggur sitt af mörkum til að tryggja að LAN-mót af þessari stærðargráðu takist sem best.

Fyrstu skrefin í skipulagningu

Þeir hafa undanfarin ár komið að skipulagningu og undirbúningi mótsins og segja að aðkoma þeirra hafi byrjað með einföldu verkefni sem fljótt þróaðist í stærra hlutverk.

„Við fengum skilaboð frá guðföður HRingsins, honum Flata. Þá vantaði aðila til að setja upp og viðhalda CS:GO serverum yfir helgina,“

segja þeir og vísa til fyrsta ársins þeirra í verkefninu, árið 2023. Árið eftir tóku þeir svo að sér bæði uppsetningu netþjóna og mótastjórn Counter-Strike mótsins.

„Mótastjóri sér um að raða saman hvernig mótið er spilað, ákveður styrkleikaröðun liða og tryggir að allt gangi upp á réttum tíma.“

Aukin ábyrgð ár frá ári

Í ár eru þeir orðnir fastir liðir í skipulagningu HRingsins og hafa tekið enn stærri þátt í undirbúningi mótsins en áður.

Tæknileg uppsetning mótsins hefst formlega daginn fyrir viðburð þegar þeir mæta á svæðið og hefja vinnu við netkerfi og netþjóna. Þó þeir gríni með að mæta „eins og prinsessur“ og krefjast þess að grunninnviðir séu tilbúnir, viðurkenna þeir að vinnan sé umfangsmikil og krefjandi.

„Við setjum serverana upp, stillum þá og byrjum að undirbúa seedin. En í raun höfum við oft fylgt ráðleggingum frá reyndari aðilum í senunni þegar kemur að styrkleikaröðun.“

Undirbúningur fyrir mótið hefur lengst af hafist snemma sumars, en í ár var farið af stað mun fyrr.

„Við byrjuðum að skipuleggja í desember, sem er í fyrsta skipti í mörg ár sem þetta gerist svona snemma,“

segja þeir og bæta við að það muni skila sér í betri framkvæmd.

Sjálfboðaliðar í lykilhlutverki

Á bakvið HRinginn stendur öflugt teymi sjálfboðaliða, að stórum hluta tengt nemendafélaginu Tvíund. Auk þeirra sitja Orri, Hilmar og Flati í sérstakri HRings-nefnd sem heldur utan um skipulag og upplýsingaflæði.

„Allir sem koma að HRingnum eru sjálfboðaliðar og margir koma aftur ár eftir ár því þetta er einfaldlega svo skemmtilegt.“

Þegar þeir eru spurðir um eftirminnileg augnablik nefna þeir sérstaklega úrslitadaginn.

„Sunnudagurinn, þegar við horfum á úrslitaleikinn í Counter-Strike með öllu liðinu, stendur alltaf upp úr.“

Þegar allt fór úrskeiðis

Þeir rifja þó einnig upp erfiðari stundir, sérstaklega árið 2024 þegar þeir voru nýir í hlutverkinu.

„Við settum mótið af stað en ekkert gerðist. Þá kom í ljós að aðeins við gátum skipt um map en ekki spilararnir. Á þeim tímapunkti langaði okkur að labba bara út.“

Þrátt fyrir slíkar byrjunarörðugleika hefur reynslan styrkt teymið og nú ríkir bjartsýni fyrir komandi móti.

„Bara af þeirri ástæðu að undirbúningur er hafinn svona snemma getum við lofað að þessi HRingur verður besti HRingurinn, sennilega frá upphafi.“

Leikjahýsing án endurgjalds

Til gamans má geta að þeir félagar reka einnig heimasíðuna spicy.is í frístundum, þar sem þeir bjóða upp á meðal annars Minecraft og Vintage Story, og íslenskum spilurum stendur til boða leikjahýsing án endurgjalds.

HRingurinn fer fram í Háskóla Reykjavíkur dagana 7. til 9. ágúst og má búast við fjölmennu og öflugu móti þar sem bæði keppendur og áhorfendur koma saman í einni stærstu rafíþróttahátíð landsins.