Umdeild bannalda í skotleiknum Marvel Rivals hefur vakið hörð viðbrögð úr leikjasamfélaginu eftir að fjölmargir leikmenn voru tímabundið útilokaðir frá leiknum, að því er virðist fyrir gagnrýni og pólitíska skírskotun fremur en óæskilega hegðun í leik.
Uppþotið hófst þegar vinsæll streamer, sem gengur undir nafninu Panda, var bannaður í fjóra daga eftir að hafa birt myndband þar sem hann notar setninguna „Taiwan number one“. Þessi setning hefur lengi verið notuð í háðsglensi gagnvart kínverskum netnotendum og tengist kröfum um sjálfstæði Taívans, sem kínversk stjórnvöld líta á sem árásargjarna áróður.
Í frétt á VideoGamer kemur fram að í kjölfarið stigu aðrir leikmenn fram og greindu frá sambærilegum bönnum, meðal annars fyrir að tjá sig um leikinn eða þróunarteymið á vettvangi eins og Discord og samfélagsmiðlum. Margir þeirra fullyrða að bönnin hafi ekki átt sér stað vegna brota á reglum heldur vegna skoðana sem lutu hvorki að hatursorðræðu né ósæmilegri framkomu í leiknum sjálfum.
Þrýstingur jókst hratt á kínverska leikjafyrirtækið NetEase, sem þróar Marvel Rivals, og að lokum gaf talsmaður fyrirtækisins út yfirlýsingu þar sem viðurkennt var að „Sum tilvik þar sem gripið var til banns“ hafi verið ranglega framkvæmd.
Margir líta á refsingarnar sem birtingarmynd vandamála, þar sem pólitísk áhrif og ritskoðun ráða för á kostnað tjáningarfrelsis og gagnsæis í leikjamenningu. Bent hefur verið á að þegar alþjóðlegir fjölnotendaleikir eru í höndum fyrirtækja sem lúta pólitískum þrýstingi heimalands síns, geti það haft alvarleg áhrif á frjálsa umræðu meðal leikmanna.
Marvel Rivals, sem er skotleikur í anda Overwatch, hefur notið mikillar athygli síðan prufuútgáfa hans var kynnt. Nú kann framtíðin að ráðast af því hvort NetEase tekst að bregðast fumlaust við gagnrýninni og byggja upp traust að nýju.
Mynd: Marvel Rivals / Pixabay
