Starfsmannafélög sem fara með hagsmuni starfsfólks hjá Ubisoft í Frakklandi hafa samkvæmt erlendum miðlum samþykkt einróma að boða til verkfalls í kjölfar umfangsmikilla skipulagsbreytinga hjá fyrirtækinu sem gæti leitt til starfsloka hjá allt að 200 starfsmönnum í höfuðstöðvum þess í París, samkvæmt fyrirliggjandi tillögu.
Eins og greint var frá í síðustu viku kynnti Ubisoft svokallað „endurræsingu“ á starfsemi sinni, sem fól meðal annars í sér niðurfellingu sex leikjaverkefna, þar á meðal endurgerðarinnar af Prince of Persia: The Sands of Time. Þá var tilkynnt um tafir á sjö öðrum leikjum, lokun farsímavers í Halifax í Kanada og stúdíó í Stokkhólmi, auk þess sem starfsfólk var kallað aftur til vinnu á skrifstofu fimm daga vikunnar.
Í framhaldinu hefur Ubisoft lagt fram tillögu um svokallaða Rupture Conventionnelle Collective, eða RCC, sem er franskt ferli þar sem starfsfólk og atvinnurekandi semja sameiginlega um starfslok. Samkvæmt tillögunni gætu allt að 200 störf í höfuðstöðvum Ubisoft í París horfið, sem jafngildir um 18 prósentum af þeim um 1.100 starfsmönnum sem þar starfa.
Í yfirlýsingu sem Ubisoft sendi frá sér til IGN staðfesti talsmaður fyrirtækisins að viðræður væru hafnar um mögulega RCC-samkomulag. Þar kom fram að um væri að ræða tillögu en engin ákvörðun yrði tekin fyrr en samkomulag næðist við fulltrúa starfsfólks og frönsk stjórnvöld hefðu veitt samþykki sitt. Jafnframt var tekið fram að tillagan næði eingöngu til starfsmanna Ubisoft International með franska ráðningarsamninga og hefði engin áhrif á önnur dótturfélög eða starfsfólk Ubisoft annars staðar í heiminum.
Samkvæmt franska viðskiptamiðlinum Les Echos hafa öll helstu stéttarfélög sem starfa innan Ubisoft, þar á meðal STJV, Solidaires Informatique, CFE-CGC, CGT og Printemps écologique, samþykkt að boða til verkfalls í mótmælaskyni við tillöguna. Verkfallið er áætlað dagana 10. til 12. febrúar og stefna félögin jafnframt að samhæfa aðgerðir sínar við systurfélög erlendis til að víkka út mótmælin.
Í kjölfar tilkynningarinnar um endurskipulagningu hefur gengi hlutabréfa Ubisoft fallið verulega. Hlutabréf fyrirtækisins lækkuðu um 34 prósent á skömmum tíma og hafa ekki verið jafn lágt verðlögð í um 15 ár.
