Framtak Bridgesambands Íslands og Rafíþrótta Símans, að senda út leik í beinni útsendingu, viðburður sem varð að veruleika í fyrravetur, rúllar nú aftur af stað, briddsurum til mikillar ánægju. Spilað verður á komandi vetri á sunnudagskvöldum og hefst útsending alltaf klukkan 19.
Fyrsta leikinn, 20. september sl., spiluðu Áhöfnin á Halastjörnunni gegn norska kvennalandsliðinu. Til að gera langa sögu stutta rústuðu norsklu stelpurnar íslensku strákunum og var sigur þeirra aldrei í hættu. Munaði þar mestu um sagnhörku kvenpeningsins umfram karldýrin. Þegar geimin sem íslensku herrarnir slepptu og slemman sem norsku dömurnar melduðu en ekki Íslendingarnir lá allt til vinnings, var ekki að sökum að spyrja.
Geta má þess að annað kvennaparið vekur á 8-10 punkta grandi utan hættu.
Næsti leikur fer í loftið klukkan 19 næsta sunnudag. Alls keppa 16 sveitir, jafnt innanlands sem utan. Sveit má tapa einu sinni án þess að falla úr keppninni en annars verður barist til síðasta blóðdropa.
Mynd: Bridgesambands Íslands
