Arc Raiders er kominn á útsölu í fyrsta sinn síðan hann kom út í lok október og það aðeins nokkrum mánuðum eftir útgáfu. Samhliða vetrarútsölum á Steam og Xbox hefur verðið verið lækkað um tuttugu prósent og stendur nú í 32 Bandaríkjadölum, niður úr 40 dollurum sem þótti strax hóflegt upphafsverð miðað við umfang og gæði leiksins.
Arc Raiders leit dagsins ljós 30. október og hlaut strax afar jákvæðar viðtökur gagnrýnenda og spilara. Leikurinn sameinar spennu PvP bardaga við PvE áskoranir í krefjandi survival umhverfi þar sem hver ferð út á kortið getur endað annaðhvort í sigri eða algjörri niðurlægingu. Þrátt fyrir að leikurinn hafi fengið gagnrýni fyrir notkun gervigreindar til að mynda raddir í stað þess að leita til mannlegra raddleikara, hefur heildarmyndin verið afar sterk og margir telja þetta einn best heppnaða extraction-leik ársins.
Bak við leikinn stendur Embark Studios, sem hefur á undanförnum árum byggt upp orðspor fyrir tæknilega metnaðarfulla fjölspilunarleiki. Í Arc Raiders skín það sérstaklega í gegn hvað varðar leikflæði, hljóðhönnun og spennuuppbyggingu, þar sem jafnvel einföld undankoma getur orðið að minnisstæðu augnabliki.
Þó rétt sé að nefna að leikurinn býður upp á fjölbreytt úrval fatnaðar og útlitsmuna gegn greiðslu þá hafa þeir engin áhrif á spilun og má algjörlega hundsa þá. Kjarni leiksins stendur sjálfstæður og ótruflaður, sem gerir afsláttinn enn áhugaverðari fyrir þá sem hafa verið tvístígandi.
Arc Raiders er nú fáanlegur á PC og Xbox á lækkuðu verði út vetrarútsöluna og er af mörgum talið meðal bestu kaupa um þessar mundir. Fyrir áhugafólk um krefjandi fjölspilunarleiki með mikla spennu í hverri lotu gæti þetta verið rétti tíminn til að stökkva inn.
Myndir: arcraiders.com
