Nú styttist í að íslenski tölvuleikjaframleiðandinn CCP opni fyrir spilun á nýjustu afurð sinni, fjölspilunarleiknum DUST 514. Sem kunnugt er verður leikurinn aðeins fáanlegur á PlayStation 3 leikjatölvunni og það gjaldfrjálst, en þetta kemur fram á fréttavefnum visir.is.
Svokölluð Beta-útgáfa af DUST 514 fer í loftið þann 22. janúar næstkomandi. Síðustu ár hefur CCP unnið að þróun tölvuleiksins en hann markar að mörgu leyti tímamót í leikjasögunni.
Síðustu mánuði hefur leikurinn verið í lokaðri spilun, nú er komið að því að hefja opna prufukeyrslu.
Á dögunum var DUST 514, sem er fyrstu persónu skotleikur, tengdur við fjölspilunarleik CCP, EVE Online, en leikirnir tveir eiga sér stað í hinum eina og sama söguheimi. Þannig munu eigendur PlayStation 3 leikjatölvunnar og spilarar á PC eða Mac tölvum nú geta haft samskipti í fyrsta sinn.
„Opin prufukeyrsla DUST 514 markar annað skref í átt að langtímamarkmiðum okkar er varða DUST 514 og EVE Online,“ segir Hilmar Veigar Pétursson, forstjóri CCP. „En þetta er aðeins byrjunin. Rétt eins og við höfum gert með EVE Online þá munum við á næstu vikum og árum halda áfram að bæta og víkka við reynslu spilara af DUST 514.“
Í fyrra myndbandinu hér fyrir neðan má sjá brot úr DUST 514 og myndbandið þar fyrir neðan er stutt kynningarmyndband sem leikjavefsíðan vinsæla IGN tók saman um tölvuleikinn.
Greint frá á visir.is.
