Mynd: eslgaming.com
Fjögur af sterkustu Counter-Strike 2 liðum heims mætast í undanúrslitum ESL Pro League Season 24 í dag, laugardaginn 10. október. Mótið fer fram í Katowice í Póllandi og lýkur á morgun, sunnudaginn 11. október.
Átta liða úrslitin fóru fram í gær og lauk öllum fjórum viðureignunum með 2:0 sigri. Team Vitality, Aurora Gaming, MOUZ og Team Spirit tryggðu sér þar með sæti í undanúrslitum.
Öflug lið mætast í undanúrslitum
Team Vitality tryggði sér sæti í undanúrslitum með öruggum 2:0 sigri á PARIVISION. Liðið vann fyrri leikinn á Inferno 13:2 og þann síðari á Dust2 13:10.
Aurora Gaming hafði betur gegn 1win, einnig 2:0. Aurora vann Dust2 13:9 og Anubis 13:8.
MOUZ sýndi sömuleiðis styrk sinn gegn FURIA og vann 2:0. Fyrri leikurinn á Nuke fór 13:10 og sá síðari á Inferno 13:6.
Team Spirit tryggði sér síðasta sætið í undanúrslitum með 2:0 sigri á Team Falcons. Spirit vann Mirage 13:8 og Anubis 13:10.
Undanúrslitin fara fram í dag
Tvær viðureignir fara fram í undanúrslitum í dag og eru leiktímar eftir íslenskum tíma:
- Kl. 13:45: Team Vitality gegn Aurora Gaming
- Kl. 17:00: MOUZ gegn Team Spirit
Leikið verður þar til annað liðið hefur unnið tvö kort í hvorri viðureign.
Sigurliðin mætast síðan í úrslitaleik mótsins á morgun, sunnudaginn 11. október. Þá fer einnig fram viðureign um þriðja sætið.
Ein milljón Bandaríkjadala í verðlaunafé
ESL Pro League Season 24 hófst 3. október með þátttöku 16 liða. Átta þeirra komust áfram í úrslitakeppnina sem hófst 9. október í Spodek keppnishöllinni í Katowice.
Heildarverðlaunafé mótsins nemur einni milljón Bandaríkjadala og fær sigurliðið 295 þúsund dali, þar af renna 125 þúsund dalir til leikmanna.
Úrslitaleikurinn fer fram á morgun og verður þar leikið þar til annað liðið hefur unnið þrjú kort.
Hægt er að fylgjast með viðureignunum í beinni útsendingu á YouTube og Twitch rásum ESL Counter-Strike.
