Dune: Awakening, nýjasti leikurinn frá norska leikjafyrirtækinu Funcom, hefur slegið í gegn frá útgáfu sinni þann 10. júní. Nú þegar hafa yfir 1 milljón spilara spilað leikinn – og hefur hann þar með orðið söluhæsti leikur Funcom frá upphafi.
Til samanburðar tók það Conan Exiles heilt ár að ná sömu spilunartölum.
„Við erum virkilega auðmjúk og þakklát fyrir þetta ótrúlega viðbragð,“
segir í tilkynningu frá Funcom, sem lýsir upphafi leiksins sem eins konar „Coriolis-stormi“ sem þróunarteymið sé enn að sigla í gegnum.
Leikurinn, sem byggður er á Dune-heiminum eftir Frank Herbert, hefur vakið mikla athygli fyrir bæði útlit og spilun. Spilarar hafa deilt afreksverkum sínum á samfélagsmiðlum – allt frá glæstum byggingum og æsilegum eltingarleikjum við risaskepnuna Shai-Hulud, til hetjudáða, óvæntra sigra og dauða.
Í tilefni af þessum áfanga hefur Funcom birt myndræna samantekt (Sjá mynd neðst í frétt) yfir helstu afrek og atvik frá fyrstu dögum leiksins, undir yfirskriftinni „Deeds and Deaths“ – þar sem svokallaðir Sleepers eru heiðraðir.
Að auki hafa nokkrir lykilstarfsmenn Funcom tekið þátt í AMA (Ask Me Anything) umræðu á Reddit þar sem þeir svöruðu spurningum spilara og gáfu innsýn í framtíðaráform fyrir leikinn. Þar má finna ýmsar áhugaverðar upplýsingar um áframhaldandi þróun og væntanlegt efni.
Sölutekjur í hæstu hæðum
Athugið: Um er að ræða grófa áætlun sem ekki tekur mið af afslætti, sköttum, þóknunum dreifingaraðila (svo sem Steam) né öðrum tilfallandi gjöldum. Hún gefur þó skýra mynd af umfangi og áhrifum velgengni leiksins.
Miðað við söluverð leiksins, 49,99 bandaríkjadali, og að milljón spilara hafi fest kaup á honum, má áætla að heildartekjur Funcom nemi um það bil 7 milljörðum íslenskra króna. Með því telst Dune: Awakening þegar orðinn einn arðbærasti útgáfuleikur fyrirtækisins – og það innan við einni viku frá útgáfu.
Myndir: duneawakening.com
