Aðdáendur EVE Online um allan heim eru að undirbúa sig fyrir stærsta viðburð ársins í leikjaheiminum, þegar EVE Fanfest 2025 verður haldin í Hörpu dagana 1.–3. maí.
Viðburðurinn, sem hefur lengi verið í hávegum hafður meðal leikmanna og þróunarteymisins hjá CCP Games, lofar að verða magnað ævintýri með nýjungum, fyrirlestrum, pallborðsumræðum, lifandi streymi og eftirminnilegum samkomum.
Sjá einnig: EVE Fanfest 2025: Geimförunum boðið í stórveislu í Reykjavík
Glæsileg dagskrá fyrir gesti og áhorfendur heima
Í ár verður Harpa miðpunktur hátíðarinnar þar sem gestir sækja sér Fanfest aðgangspassa, njóta fjölbreyttra viðburða og skipuleggja eigin dagskrá í gegnum sérstakt skráningarkerfi. Fyrir þá sem ekki komast til Reykjavíkur verður viðburðurinn streymt beint á Twitch-rás CCP, þar sem fylgjast má með lykilatriðum hátíðarinnar og jafnframt fá verðlaun í leiknum fyrir áhorf.
Dagskráin inniheldur hápunkta eins og opnunarhátíð EVE Fanfest á föstudeginum kl. 16:00, „Art of EVE“ kynningu á laugardagsmorgni, og stórar tilkynningar um nýjungar í EVE Vanguard og nýja stóra viðbót fyrir EVE Online síðar sama dag.
Sérstakir gestafyrirlesarar munu einnig skreyta dagskrána. Þar má nefna Dr. Ronald Turner frá NASA og stjörnufræðinginn Dr. Becky Smethurst, sem mun flytja erindi um hvernig ofur-massamikil svarthol verða til, auk þess að leiðrétta algengar ranghugmyndir um svarthol í dægurmenningu.
Sjá einnig: Vísindaráðgjafi NASA meðal heiðursgesta á EVE Fanfest 2025
Einstök upplifun á staðnum: Spjall, sýningar og smakk
Á meðal nýjunga á Fanfest í ár er „Little Things“ umræðuþátturinn, þar sem leikmenn geta rætt umbætur á notendaupplifun EVE. Einnig verður í boði sérstakt spjall „Undocking into a New World“, þar sem þátttakendur deila fyrstu minningum sínum úr leiknum.
Á staðnum verða ýmis kynningarsvæði, þar á meðal „Central Point“ með sýnikennslu á EVE Vanguard, og „Frontier“ þar sem gestir geta prófað nýjustu prufugerðir leikjanna. Í „Art Corner“ fá listunnendur að skyggnast bak við tjöldin í myndsköpun New Eden.
Í samstarfi við Lady Brewery verður einnig kynnt til sögunnar sérstök Fanfest 2025 bjórtegund, auk þess sem Eimverk Distillery býður upp á afar takmarkað magn af „20 Years in Space“ safnviskíi sem eingöngu verður fáanlegt á viðburðinum.
Samfélag og samverustundir
EVE Fanfest snýst ekki aðeins um kynningar og fyrirlestra. Samfélagsviðburðir, skoðunarferðir og „Party at the Top of the World“ partíið á föstudagskvöldinu munu gera hátíðina ógleymanlega fyrir alla viðstadda.
Aðgengi, viðskipti og upplýsingagjöf
Harpa býður upp á góða aðstöðu fyrir alla, með aðgengi fyrir fatlaða, bílastæði og upplýsingaborð um alla dagskrá Fanfest. Í „Trade Hub“ geta gestir verslað EVE-vörur, allt frá fatnaði til heimilisvara.
Hér geturðu kynnt þér alla dagskrána fyrir EVE Fanfest 2025.
Myndir: eveonline.com
