esports.is Íslenska leikjasamfélagið
Leikjaframleiðandinn Sky Games býður spilurum í nýjan og spennandi bardaga í Make It Count – fjölspilunar-skotleik. Leikurinn blandar saman Top-down (Með sjónarhorni sem minnir á Diablo-leiki, roguelite-stíl og áherslu á samvinnu fyrir allt að þrjá leikmenn.
Þeir sem taka sér hlutverk eftirlifenda í Make It Count takast á við ógn sem stafar af afskræmdum og yfirnáttúrulegum óvættum sem hafa lagt jörðina undir sig – verum sem minna helst á uppvakninga. Til að lifa af þarf að safna búnaði, takast á við fjölbreytt verkefni og vanda hverja ákvörðun – því skotfæri eru ekki endalaus og dauðinn getur leynst á næsta horni.
Endurspilun og samvinna í forgrunni
Leikurinn er byggður á breytilegum kortum þar sem leiðir, verkefni raðast upp af handahófi í hverri umferð. Það tryggir að engin tvö spil eru eins – og býður upp á fjölbreyttar leiðir til að nálgast baráttuna. Þó að leikurinn hafi haft ákveðna heildarmynd og flæði, hefði persónulegri spilun reynst auðveldari ef hægt væri að halda áfram þar sem maður datt út. Að þurfa sífellt að byrja frá byrjun var ekki alveg minn tebolli – en það er hluti af áskoruninni sem fylgir roguelite.
Skotfæri og átök við ólíka óvini
Einn af kjarnaþáttum leiksins er takmörkuð notkun á skotfærum. Þó þau séu ekki endilega af mjög skornum skammti, þarf að forgangsraða notkun þeirra. Oftar en einu sinni varð ég uppiskroppa með skot og neyddist til að grípa til aukavopn, eins og skammbyssu sem olli minni skaða – sérstaklega gegn hörðustu uppvakningunum. Þessi þáttur ýtir undir taktíska hugsun en gæti nýst betur með aðeins opnari dreifingu á skotfærum.
Takmörkuð sýn eykur spennuna
„Fog of War“ eða svokölluð þokuslæð gerir leikupplifunina ófyrirsjáanlega og spennuþrungna. Leikmaður sér aðeins takmarkað fram fyrir sig og hættan getur skotið upp kollinum fyrirvaralaust. Þessi þáttur krefst þess að leikmenn haldi sig saman og vandi til verka, sérstaklega þegar farið er inn á ný svæði eða þegar stórir óvinahópar láta til sín taka.
HUB-svæði – uppfæra persónur og vopn
Utan bardagasvæða geta leikmenn dvalið í svokölluðu HUB-svæði, þar sem hægt er að uppfæra bæði persónur og vopn. Þar má einnig hanna og skreyta rýmið eftir eigin höfði.
Samantekt
Make It Count er metnaðarfullur og ákaflega aðgengilegur roguelite-skotleikur með áherslu á samvinnu. Þó að ég persónulega hafi saknað þess að geta haldið áfram þar sem frá var horfið – frekar en að hefja leikinn alltaf upp á nýtt – þá heldur hann dampi með fjölbreyttum verkefnum og spennandi óvissuþáttum.
Grafíkin er þokkaleg og leikurinn keyrir vel, en með betri dreifingu á skotfærum hefði bardagaþátturinn fengið enn meiri dýpt og sveigjanleika.
Leikurinn kemur út á Steam þann 19. maí 2025.
Ég fékk leikinn án endurgjalds gegnum Keymailer.co. Rýnin er byggð á minni eigin reynslu og birting hennar er án utanaðkomandi áhrifa.
Myndir: skjáskot úr leik – Gif myndir eru frá leikjahönnuði Make It Count
