Slagsmálaleikurinn 2XKO, nýjasta útspil Riot Games sem byggir á persónum og heimi League of Legends, er á leiðinni á console í janúar 2026. Leikurinn hefur hingað til aðeins verið aðgengilegur á PC í Early Access útgáfu en hefur vakið mikla athygli hjá bardagaleikjasamfélaginu.
Riot staðfesti útgáfudag tölvuútgáfunnar í upphafi nýs uppfærslumyndbands sem birt var í dag. Þar kom fram að 2XKO verður fáanlegt á PS5 og Xbox Series X|S strax í janúar 2026 og spilarar geta nú þegar sett hann á óskalista sína. Fyrirtækið hefur áður staðfest að leikurinn styðji cross-platform progression þannig að framvinda flyst milli kerfa þegar leikurinn verður kominn á fleiri miðla.
Í myndbandinu var einnig farið yfir hvernig keppnissenan mun þróast á næsta ári. Riot hefur gert samstarf við fjölda mótshaldara um stórt Major-mót og þrjú Challenger-mót sem dreifast yfir fimm árstíðir innan leikjársins 2026. Þetta er skýr vísbending um að 2XKO verði stór hluti af alþjóðlegri bardagaleikjamenningu á komandi ári.
Console spilarar þurfa því ekki að bíða lengi. 2XKO hefur fengið nokkrar uppfærslur, lagfæringar og breytingar frá því að Early Access útgáfan fór í loftið í haust og er greinilega að þokast hratt í átt að fullri útgáfu.
Mynd: riotgames.com
