Rafíþróttasamband Íslands (RÍSÍ) veitti Birni Gíslasyni, formanni Fylkis og borgarfulltrúa, sérstaka viðurkenningu á Skjálfta nú um helgina fyrir óeigingjarnt og ómetanlegt framlag hans til uppbyggingar rafíþrótta á Íslandi.
Í tilkynningu frá RÍSÍ kemur fram að viðurkenningin, sem ber heitið Hvatningarverðlaun Rafíþróttasambands Íslands, var afhent í fyrsta skipti við hátíðlega athöfn á Skjálfta af Willum Þór Þórssyni forseta Íþrótta- og Ólympíusambands Íslands (ÍSÍ), Kára Björnssyni formanni RÍSÍ og Ólafi Hrafni Steinarssyni, stofnanda og fyrrverandi formanni sambandsins.
„Með þessari viðurkenningu viljum við heiðra ómetanlegt framlag Björns við að efla samfélag rafíþrótta á Íslandi, skapa jákvæðar fyrirmyndir og stuðla að áframhaldandi vexti og viðgangi greinarinnar,“
segir Jökull Jóhannsson, framkvæmdastjóri Rafíþróttasambands Íslands.
Skjálfti, var lykilviðburður í íslensku rafíþróttalífii, haldinn á árunum 1998-2005 en nú endurvakinn eftir tuttugu ára hlé. Alls tóku um þrjú hundruð manns þátt í mótinu, sem lauk um helgina.
Myndir: Rafíþróttasamband Íslands / Atli Már Guðfinnsson
