Mynd: facebook / Hafþór Júlíus Björnsson – The Mountain
Sterkasti maður Íslands hefur bætt nýrri áskorun við feril sinn. Hafþór Júlíus Björnsson, sem margir þekkja einnig sem „The Mountain“ úr Game of Thrones, keppir nú í fimmtu deild Rafíþróttasambands Íslands í Counter-Strike 2.
Hafþór leikur með liðinu TurboStorm og spilar undir nickinu „The Mountain“. Með honum í liðinu eru Citru$, hopah, HitKillah og TurboDrake. TurboStorm er ekki nýtt metnaðarfullt lið í keppninni, því liðið tók einnig þátt í mótinu á síðasta tímabili og mætir því reynslumeira til leiks að þessu sinni.
Upphaf tímabilsins lofar engu að síður góðu, þar sem TurboStorm hefur unnið báðar fyrstu viðureignir sínar og er komið í 2–0. Sterk byrjunin bendir til þess að liðið hafi byggt ofan á reynsluna frá fyrra ári og hyggist láta til sín taka í deildinni.
Þátttaka Hafþórs vekur eðlilega athygli, bæði innan rafíþróttasenunnar og utan hennar, enda fátt algengt að heimsþekktur afreksíþróttamaður úr keppnum sterkustu manna heims, taki þátt í skipulagðri deildarkeppni í rafíþróttum á Íslandi. Með áframhaldandi góðum árangri TurboStorm má ætla að áhuginn á gengi liðsins aukist enn frekar þegar líður á tímabilið.
Gífurlegur fjöldi liða tekur nú þátt í Counter-Strike deildum Rafíþróttasambands Íslands, RÍSÍ, á vortímabilinu. Keppnirnar eru á dagskrá í Sjónvarpi Símans kl. 19:00 á þriðjudags- og fimmtudagskvöldum og eru jafnframt sýndar í beinni á www.twitch.tv/rafithrottir.
