Leikurinn Celebrity Slot Machine byggir á einföldum spilakassa þar sem spilarar byrja með 1.000 kr inneign og reyna að auka inneignina með því að veðja á valdar línur. Snúningarnir eru hraðir og leikurinn heldur góðum takti – spilarar þurfa ekki að bíða lengi eftir niðurstöðu þegar hjólin snúast. Þegar vinnningur kemur þá getur spilarinn valið á milli þess að taka vinninginn eða tvöfalda hann í „rauður eða svartur“ áhættuspili.
Eins og nafnið gefur til kynna, eru mörg kunnugleg andlit úr heimi frægðar og frama á hjólunum. Þar má meðal annars sjá Ed Sheeran, Selenu Gomez, Taylor Swift, Ryan Gosling og Rihönnu, svo fáein nöfn séu nefnd.
Árangur leikmanna er skráður á stigatöflur sem gera kleift að bera sig saman við aðra – hvort sem er daglega, vikulega eða mánaðarlega og eykur það keppnisandann meðal spilara.
Þrátt fyrir að vera einfaldur í uppbyggingu, er Celebrity Slot Machine prýðileg afþreying fyrir þá sem vilja skemmta sér í stuttum lotum með léttum keppnisanda, stjörnuljóma og örlitlu glimmeri.
Ég fékk leikinn án endurgjalds gegnum Keymailer.co. Rýnin er byggð á minni eigin reynslu og birting hennar er án utanaðkomandi áhrifa.
Myndir: skjáskot úr leik
