Sannkölluð StarCraft hátíð verður haldin laugardaginn 7. mars klukkan 13:00 á rafíþróttamiðstöðinni Next Level Gaming í Egilshöll. Aðgangur er ókeypis og tölvur staðarins verða opnar öllum aðdáendum StarCraft sem vilja taka þátt, hvort sem er í keppni eða til að spila sér til skemmtunar.
Á dagskránni er stefnt að því að krýna Íslandsmeistara í bæði StarCraft: Brood War og StarCraft II. Sigurvegarar mótanna hljóta verðlaunabikar og þar með formlegan titil Íslandsmeistara.
Keppni í StarCraft: Brood War hefst klukkan 13:00 með 1v1 móti. Keppt verður í tveimur styrkleikaflokkum, annars vegar Chobos og hins vegar Gosus. Sá sem sigrar Gosus flokkinn verður krýndur Íslandsmeistari. Samhliða mótinu verða tölvur einnig opnar fyrir þá sem vilja spila svokallað casual og njóta stemningarinnar án keppnispressu.
Úrslitaleikur Brood War fer fram klukkan 16:00. Honum verður streymt og lýst á stórum skjá á staðnum svo gestir geti fylgst með baráttunni um titilinn í beinni.
Klukkan 18:00 hefst síðan 1v1 mót í StarCraft II. Líkt og fyrr um daginn verða tölvur opnar fyrir þá sem vilja spila til gamans. Úrslitaleik StarCraft II verður einnig streymt og lýst á stóra skjánum. Að loknu 1v1 mótinu fer af stað 2v2 casual mót fyrir þá sem vilja halda áfram að keppa og njóta kvöldsins.
Þátttakendur eru beðnir um að mæta tuttugu mínútum áður en þeirra mót hefst svo skipulag gangi sem best fyrir sig. Skipuleggjendur hvetja alla til að mæta tímanlega og taka virkan þátt í deginum.
Happy hour verður í boði allan daginn fyrir þá sem taka þátt í viðburðinum.
Viðburðurinn er jafnframt haldinn í tilefni þess að 28 ár eru liðin frá útgáfu StarCraft. Skipuleggjendur hvetja alla, óháð getu og reynslu, til að mæta og fagna með samfélaginu. Hér gefst einstakt tækifæri til að hittast, rifja upp gamla tíma og heiðra eina áhrifamestu RTS leikjaseríu allra tíma.
Hér má finna Facebook-viðburðinn.
