Undirbúningur er hafinn fyrir eitt stærsta mót ársins í Warhammer 40,000 á Íslandi, þegar ICE HAMMER ITC GT I fer fram dagana 18. og 19. apríl næstkomandi. Um er að ræða svokallað Grand Tournament þar sem bestu spilurum landsins og áhugafólki gefst kostur á að etja kappi í fimm umferðum yfir helgina.
Mótið verður haldið í húsnæði Tennis- og badmintonfélags Reykjavíkur, TBR, í Gnoðavogi, þar sem aðstaða er til fyrirmyndar fyrir slíkan viðburð. Samkvæmt skipuleggjendum er þetta stærsta Warhammer 40.000 mót ársins hér á landi og er mikill áhugi þegar farinn að myndast meðal spilara.
Skráning stendur nú yfir og er pláss fyrir 34 keppendur. Áhugasamir eru hvattir til að skrá sig tímanlega þar sem búast má við að fyllist hratt í sæti. Með 32 daga í mótið er spennan farin að magnast og ljóst að viðburðurinn verður einn af hápunktum ársins í íslensku mótahaldi.
Frekari upplýsingar má nálgast á Facebook-síðum Ice Hammer og Warhammer á Íslandi, þar sem uppfærslur og nánari útfærsla mótsins verða birtar á næstu vikum.
