Stofnandi og forstjóri MindsEye hefur sakað ónefndan bandarískan risa um skipulagða skemmdarherferð gegn leiknum og stúdíóinu Build a Rocket Boy, herferð sem hann fullyrðir að hafi kostað yfir eina milljón evra á síðasta ári.
Þetta kom fram á innanhússfundi með starfsfólki Build a Rocket Boy seint í janúar, þar sem Mark Gerhard opnaði fundinn á dramatískum nótum og sagðist vera „búinn að hafa hendur í hári þeirra sem stóðu að skemmdarverkunum“.
Upptaka af fundinum var send til Insider Gaming með því skilyrði að hún yrði ekki birt opinberlega, en miðillinn birti hana engu að síður þar sem málið þótti fréttnæmt.
Samkvæmt Gerhard var herferðin fjármögnuð af „mjög stóru bandarísku fyrirtæki“, þó hann bætti við að um væri að ræða aðila sem væri „líklega ekki sá sem fólk heldur fyrst“. Hann hélt því jafnframt fram að fyrirtækið hefði greitt bresku stofunni Ritual Network fyrir að framkvæma herferðina. Gerhard lýsti Ritual Network á fundinum með ansi litríku orðalagi og sakaði fyrirtækið um að hafa greitt áhrifavalda, blaðamenn og jafnvel starfsmenn Build a Rocket Boy fyrir að skaða orðspor MindsEye og stúdíósins.
Meðal þeirra sem Gerhard nefndi var áhrifavaldurinn Cyberboi, sem hann hafði nýverið hótað með lögbanni í gegnum Discord, auk þriggja blaðamanna og ótilgreindra starfsmanna fyrirtækisins. Allir þessir aðilar muni, að hans sögn, verða kærðir persónulega á næstunni og ákærur snúist meðal annars um njósnir, skemmdarverk og refsiverða íhlutun í rekstur fyrirtækis.
„Allir sem komu að þessu eiga í raunverulegum vandræðum, þar á meðal fyrirtækið sem stóð á bak við þetta. Þetta er upphafið að endurkomu okkar,“
sagði Gerhard á fundinum og bætti við að baráttan myndi að lokum vinnast með gæðum leikjanna sjálfra og ástríðunni sem lögð væri í MindsEye.
Ritual Network hafnar hins vegar alfarið ásökununum. Í skriflegu svari til Insider Gaming segir fyrirtækið að það sé vettvangur fyrir stuðning við efnishöfunda og komi málinu ekki við. Þar kemur jafnframt fram að fyrirtækið hafi ekki fengið neinar upplýsingar um lögmætar aðgerðir gegn sér né sé meðvitað um nein gögn sem styðji fullyrðingar Gerhard.
Talsmaður Build a Rocket Boy vildi ekki tjá sig beint um leka innanhússfundarins, en staðfesti þó að fyrirtækið teldi sig hafa orðið fyrir skipulagðri og illviljaðri herferð sem hefði það að markmiði að grafa undan trausti á MindsEye. Aðgerðir væru þegar hafnar í samvinnu við lögfræðinga fyrirtækisins.
Þó að ásakanirnar séu alvarlegar og orðalagið á fundinum langt frá því að vera varfærnislegt, er ljóst að málið er aðeins rétt að byrja. Hvort hér sé um raunverulega samsærisherferð að ræða eða átök sem muni leysast fyrir dómstólum á eftir að koma í ljós. Þar til þá virðist Build a Rocket Boy ætla að halda sig við klassíska nördalausnina. Að láta leikinn tala.
Myndir: Steam / MindsEye
