Eftir fjögur ár af stöðugum uppfærslum og nýlegri útgáfu sem átti að blása lífi í leikinn, hefur Amazon Games ákveðið að stöðva alla frekari þróun á New World: Aeternum. Leikurinn mun áfram vera í gangi út árið 2026, en þar með lýkur ævintýri sem margir töldu að gæti orðið fyrsta stóra MMO-velgengni Amazon.
Ákvörðunin kemur í kjölfar umfangsmikilla niðurskurða hjá Amazon, þar sem Amazon hefur sagt upp meira en 14 þúsund starfsmönnum. Í tilkynningu frá fyrirtækinu segir að þetta sé hluti af „stefnubreytingu“ sem feli meðal annars í sér að hætt verði við stóran hluta þróunar stórra verkefna innan tölvuleikjaiðnaðarins, sérstaklega þegar kemur að MMO-verkefnum.
„Eftir fjögur ár af reglulegum uppfærslum og nýlegri útgáfu höfum við komist að því að það er einfaldlega ekki lengur sjálfbært að halda áfram að styðja við leikinn með nýju efni,“
segir í yfirlýsingu Amazon Games.
Season 10 og Nighthaven-uppfærslan verður því síðasta viðbótin í sögu New World, bæði á PC og öðrum leikjatölvum. Til að þakka leikjasamfélaginu fyrir stuðninginn í gegnum árin hefur Amazon ákveðið að gera Nighthaven-útgáfuna ókeypis fyrir alla, auk þess sem Rise of the Angry Earth verður nú einnig aðgengileg án endurgjalds fyrir PC-spilara.
Fréttin kom mörgum á óvart. New World varð aldrei stórleikur á borð við World of Warcraft eða Final Fantasy XIV, en þó hélt hann ágætis stöðu sem „miðlungsstórt MMO“ með reglulegan straum virkra leikmanna, oft á bilinu 50–60 þúsund samtímis spilara. Vandinn lá ekki í skorti á leikmönnum heldur í því að halda þeim við efnið.
Leikurinn mun áfram vera til sölu og hægt verður að kaupa mynt í leiknum, þó fæstir sjái ástæðu til þess. Amazon hyggst halda netþjónum gangandi með reglulegum lagfæringum og samruna servera eftir þörfum. Einnig verða sérstakir atburðir, bónusvikur og árstíðabundnir viðburðir áfram í boði.
Amazon lofar að halda leiknum virkum út árið 2026, en þar með virðist ljóst að dagar New World séu taldir. Fyrirtækið segir þó að leikmenn fái að minnsta kosti sex mánaða fyrirvara áður en breytingar verða gerðar sem hafa áhrif á möguleika þeirra til að spila.
Það er því hægt að halda áfram að ferðast um Aeternum með vinum sínum, berjast við skrímsli og safna silfri eins og ekkert hafi í skorist. En þegar ekkert nýtt gerist, ár eftir ár, og sólsetrið nálgast, verður spurningin óumflýjanleg: hvers vegna ætti nokkur að fjárfesta í MMO sem á enga framtíð?
Arnold fær lokaorðið í Aeternum: „I won’t be back“
Arnold Schwarzenegger ljáði rödd sína í þáttunum Secret Level frá Amazon Games, þar sem hann fór með hlutverk King Aelstrom í þáttunum New World: The Once and Future King. Þættirnir voru framleiddir til að kynna leikina á léttan og gamansaman hátt, með klassískum Arnold-húmor.
Því hver annar en Arnold Schwarzenegger ætti að fá að loka þessari sögu með klassísku línunni?
Aeternum mun halda áfram að anda um stund, en þegar loksins slökknar á netþjónunum verður aðeins eitt eftir, rödd Arnolds Schwarzenegger sem hvíslar út í tómið: I won’t be back.
Mynd: newworld.com
