Leikjafyrirtækið Tripwire Interactive hefur tilkynnt að þriðji hluti hinnar vinsælu leikjaseríu, Killing Floor, verður gefinn út á heimsvísu 25. mars næstkomandi. Leikurinn verður fáanlegur fyrir PC (í gegnum Steam og Epic Games Store), PlayStation 5 og Xbox Series X|S.
Forsala er þegar hafin fyrir bæði stafrænar og hefðbundnar útgáfur leiksins. Allar forpantanir innihalda Flatline Tactical Bundle, auk þess verða í boði sérstakar útgáfur með viðbót, svo sem Shadow Agent Specialist & Weapon Skin Sets og Nightfall Supply Pass, að því er fram kemur í tilkynningu frá Tripwire Interactive.
Fyrir þá sem vilja prófa leikinn áður en hann kemur út, verður lokað beta-próf haldið frá 20. til 24. febrúar 2025. Hægt er að skrá sig fyrir aðgang og fá frekari upplýsingar á heimasíðu leiksins á vefslóðinni killingfloor3.com.
https://youtu.be/1NE0qVN3ua4?si=6IZ1Vz050nI6Z-MM
Killing Floor 3 er hasar-/hrollvekju skotleikur sem gerist árið 2091, 70 árum eftir atburði Killing Floor 2. Í leiknum hefur stórfyrirtækið Horzine skapað her af lífverum, kallaðar Zeds, og leikmenn taka að sér hlutverk sérfræðings í uppreisnarhópnum Nightfall til að berjast gegn þessum ógnvekjandi verum. Leikurinn býður upp á 6 manna spilun eða solo fyrir þá sem kjósa að spila einir.
Með endurbættum óvinum, fjölbreyttu vopnaúrvali og gagnvirkum umhverfum lofar Killing Floor 3 að færa leikmönnum spennandi og krefjandi upplifun.
Mynd: killingfloor3.com
