Esports World Cup 2024, sem haldin var í Riyadh, Sádi-Arabíu, var stærsti viðburður sinnar tegundar með 22 rafíþróttatitlum og 60 milljón dala verðlaunafé. Þrátt fyrir umfang og metnað komu upp ásakanir um ógreidd laun til leikmanna, starfsfólks ofl.
Samkvæmt fréttum hafa margir leikmenn og starfsfólk lýst yfir áhyggjum vegna ógreiddra eða ófullnægjandi greiðslna, sem spanna allt frá nokkrum þúsundum upp í sex stafa upphæðir. Greiðsluferlið virtist vera ójafnt, þar sem þekktari leikir og lið fengu greiðslur fyrr, á meðan smærri samtök biðu enn. Leikir eins og Apex Legends, Mobile Legends Bang Bang, Tekken og PUBG Mobile eru meðal þeirra sem hafa lent í greiðsluvandræðum.
Um framkvæmd mótsins sáu: Esports World Cup Foundation sem skipuleggjandi, Savvy Games Group, dótturfélag fjármagnað af Public Investment Fund, og ESL FACEIT Group (EFG) sem framkvæmdaaðili. Margir starfsmenn hafa átt í erfiðleikum með að fá svör varðandi greiðslur sínar og óttast að tjá sig opinberlega vegna áhrifa á framtíðarstarfsmöguleika í rafíþróttum.
Í opinberri yfirlýsingu sagðist Esports World Cup (EWC) vinna að því að leysa þessi mál og að yfir 99 prósent greiðslna hafi þegar verið innt af hendi. Þeir viðurkenndu þó að smávægilegar tafir gætu átt sér stað vegna bankaferla, athugasemdar frá stjórnsýslu eða staðfestingar móttakenda. Þrátt fyrir þessa yfirlýsingu bíða sumir enn eftir greiðslum sínum.
Þessi atvik vekja upp spurningar um gegnsæi og skuldbindingu innan rafíþróttaiðnaðarins, sérstaklega þegar kemur að stórum viðburðum eins og Esports World Cup.
Mynd: esportsworldcup.com
