Microsoft kynnti á ráðstefnunni Game Developers Conference 2026 nýja sýn á framtíð leikja á Windows og Xbox. Þar kom fram að fyrirtækið hyggst gera nýja „Full-screen mode“ fyrir leikjaspilun í Windows 11 aðgengilega í apríl, undir nýju heiti, „Xbox mode“, samkvæmt upplýsingum á Windows vefnum windows.com.
Markmiðið er að gera Windows að miðju næstu kynslóðar leikjaþróunar hjá Microsoft og undirbúa jarðveginn fyrir næstu Xbox leikjatölvu fyrirtækisins, sem gengur undir vinnuheitið Helix.
Samkvæmt Microsoft er stefnt að því að samræma þróun fyrir PC og Xbox með sameinuðu þróunarumhverfi, svokölluðu Game Development Kit (GDK). Með því geta leikjaframleiðendur þróað leiki fyrir PC sem eru jafnframt tilbúnir fyrir komandi Xbox-tölvur, auk þess sem áfram verður stuðningur við núverandi leikjatölvur á borð við Xbox Series X og Xbox Series S.
Microsoft kynnti einnig ýmsar tækninýjungar sem eiga að bæta leikjaupplifun á Windows. Þar á meðal eru nýir möguleikar í DirectX sem auðvelda þróunaraðilum að nýta gervigreindartækni í grafíkvinnslu, til dæmis með stuðningi við línulega algebru í HLSL sem gerir hardware-accelerated ML-aðgerðir mögulegar beint í shaderum.
Þá verða einnig ný verkfæri fyrir villuleit og afköst í DirectX, þar á meðal auknir möguleikar í PIX greiningartólinu og svokölluð Advanced Shader Delivery, sem á að tryggja stöðugri afköst, hraðari ræsingu leikja og minna hik þegar leikur er keyrður í fyrsta skipti.
Microsoft vinnur jafnframt að endurbótum á DirectStorage, sem flýtir fyrir hleðslu leikja. Nýr stuðningur við Zstandard þjöppun og nýtt verkfæri, Game Asset Conditioning Library, eiga að bæta meðhöndlun leikjagagna og hagræða vinnslu þeirra.
Allar þessar breytingar tengjast einnig næstu Xbox leikjatölvu fyrirtækisins. Microsoft hefur þegar staðfest að hún muni geta keyrt bæði hefðbundna Xbox-leiki og PC-leiki. Það bendir til þess að leikjatölvan muni byggja á Windows og nýja Xbox mode upplifuninni.
Með þessu virðist Microsoft stefna að því að sameina PC og leikjatölvur í eitt þróunarumhverfi, þar sem Windows verður grunnurinn að framtíð Xbox leikja. Samkvæmt fyrirtækinu gæti það einfaldað þróun fyrir bæði PC og Xbox og um leið styrkt stöðu Windows sem leikjaplatform.
Mynd: windows.com
