Mynd: Amazon
Eitt stærsta rafíþróttafélag heims, Team Liquid, hefur lýst yfir vonbrigðum sínum með að útgáfa heimildarþáttarins Level Up sem sýnd er í Sádí-Arabíu skuli hafa verið ritskoðuð. Í þáttunum, sem framleiddir eru af Amazon Prime og fjalla um þátttöku helstu rafíþróttaliða í Esports World Cup, var fjarlægður sá hluti sem sneri að reynslu samkynhneigðs forstjóra félagsins, Steve Arhancet.
Í óritskoðaðri útgáfu þáttarins greinir Arhancet opinskátt frá lífi sínu sem samkynhneigður maður, uppvexti sínum íhaldssömu samfélagi í Virginíu og hvernig tölvuleikir urðu honum mikilvægt athvarf. Hann segir einnig frá því þegar hann klæddist sérstökum #Pride-búningi á Esports World Cup mótinu árið 2024 – táknrænu merki um fjölbreytileika og réttindabaráttu hinsegin fólks í rafíþróttum.
Í útgáfunni sem birt var í Sádí-Arabíu voru bæði frásögn Arhancets og Pride-táknin klippt út eða ógreinileg vegna yfirhulu (blurred). Slík ritskoðun kemur ekki á óvart í ljósi þess að samkynhneigð telst ólögleg samkvæmt Sádí-Arabískum lögum og menningarhefðum.
„Við höfum tjáð framleiðendum okkar afstöðu okkar mjög skýrt“
Í yfirlýsingu frá Team Liquid segir meðal annars:
„Við erum vonsvikin yfir því að útgáfa þáttarins sem sýnd er í Sádí-Arabíu skuli hafa verið breytt þannig að frásögn Steve Arhancet um líf sitt sem samkynhneigður maður og Pride-búningurinn okkar hafi verið fjarlægð.
Við fordæmum þessa ritskoðun og höfum haft samband við framleiðendur Level Up og Amazon til að fá skýringar. Við munum áfram bera búninginn okkar með stolti, hvar sem er í heiminum – þar með talið á Esports World Cup.“
Amazon Prime hefur hingað til ekki svarað opinberlega fyrir ritskoðunina, né er ljóst hvort breytingarnar voru gerðar að ósk fyrirtækisins, framleiðenda þáttarins eða samkvæmt beiðni yfirvalda í Sádí-Arabíu. Samkvæmt heimildum Kotaku hefur Amazon áður samþykkt breytingar á efninu sínu í samræmi við siðferðiskröfur ákveðinna landa, meðal annars hvað varðar hinsegin efni.
Esports World Cup undir smásjá – ímyndarsköpun eða mannréttindabrot?
Esports World Cup er umfangsmikið íþróttaviðburðaverkefni sem Sádí-Arabísk stjórnvöld fjármagna með það að markmiði að efla ímynd landsins á alþjóðavettvangi. Fjöldi gagnrýnenda hefur lýst yfir áhyggjum af því sem kallað hefur verið „sportswashing“ – að glæða ímynd ríkja sem eiga sér sögu um mannréttindabrot með hjálp íþrótta og menningarviðburða.
Þátttaka Team Liquid í mótinu hefur þegar vakið athygli fyrir að félagið fékk leyfi til að keppa í búningi með hinsegin regnbogalitunum. Þrátt fyrir það virðist vera ljóst að jafnvel þegar slík sýnileiki er leyfður í keppnissalnum sjálfum, eru bakvið tjöldin gerðar tilraunir til að þagga niður í sögu þess fólks sem stendur að baki baráttunni.
Atvikið vekur áleitnar spurningar um ábyrgð alþjóðlegra streymisveitna á borð við Amazon. Ættu þær að standa vörð um tjáningarfrelsi og mannréttindi eða lúta lögum og siðareglum hvers lands fyrir sig? Þegar fyrirtæki sem auglýsa fjölbreytileika og jafnrétti á heimsvísu ganga jafnframt að skilmálum ríkja sem banna slík gildi, er hætt við að traustið bresti.
Team Liquid hefur tekið afdráttarlausa afstöðu í málinu – og nú bíður heimurinn eftir því hvort Amazon og framleiðendur Level Up muni gera slíkt hið sama.
