Það er allt að fara í gang í Battlefield 6, nýjasta leiknum í stórleikjaröð DICE og EA. Trailerinn sem féll á netið í júlí gefur tóninn: nýr stríðsher, Pax Armata, hefur tekið völdin yfir hluta heimsins og öll jafnvægi eru farin út um gluggann. Nú rísa löndin gegn hvert öðru í átökum sem teygja sig frá miðri Evrópu til stranda Gíbraltar og þú ert mitt í þessu öllu saman.
Það er ljóst að markaðssetning Battlefield 6 er tekin á næsta level og það sést vel á stöðugum „drops“ og vísbendingum á samfélagsmiðlum. Þú ert sendur inn í lönd eins og Belgíu og Georgíu, þar sem Pax Armata er í óða önn að taka yfir. Þeir eru þungvopnaðir, skipulagðir og með markmið sem snúast ekki bara um völd heldur algera stjórn. Þeir kalla þetta „frið“, en við hin vitum betur.
DICE virðist leggja meiri áherslu á söguhlutann í þetta sinn, sem margir aðdáendur hafa beðið lengi eftir. Það er ljóst að herferðin í Battlefield 6 verður eitthvað sem spilarar tala um og ef marka má fyrstu myndirnar, þá verður þetta ekki bara byssubardagi heldur líka alvarlegt spurningarmerki um framtíð heimsins.
Í tilkynningu frá Electronic Arts er farið yfir sögusviðið og hvernig þessi Pax Armata-hugmynd virkar innan stærri ramma átaka og heimsstjórnmála. Þar kemur meðal annars fram að Gíbraltar verði ein af stærstu og þyngstu vígstöðvunum í herferðinni, eitthvað sem lofar miklu fyrir harða Battlefield-aðdáendur.
Leikurinn sjálfur kemur út þann 10. október 2025, samkvæmt upplýsingum af vefsíðum EA. Og nei, leikurinn verður ekki aðgengilegur fyrir eldri vélar. Battlefield 6 kemur eingöngu á PC, PlayStation 5 og Xbox Series X|S, svo ef þú ert enn á PS4 eða gamla Xbox, þá er kominn tími til að uppfæra.
Ef þú ert að bíða eftir fréttum um fjölspilunarhlutann, þá hefur EA lofað stórri kynningu þann 31. júlí. Þar fáum við að sjá hvernig allt fer á hliðina, þ.e. þetta klassíska Battlefield brjálæði sem við elskum. Við höldum niðri í okkur andanum þar til þá.
Mynd: ea.com
