Podracing-aðdáendur geta nú andað léttar. Þótt stikla Star Wars: Galactic Racer hafi vakið mikla lukku fyrir hraða og þessa klassísku setningu „þetta lítur ógeðslega vel út“, þá var eitt sem vantaði. Engir podracerar. Fyrir marga jafngilti það nánast Jedi-svikum, enda er podracing eitt það helgasta sem kom út úr Star Wars: Episode I: The Phantom Menace sem er hluti af minningu Star Wars-nörda.
Leikurinn var kynntur í fyrra á The Game Awards og er í þróun hjá Fuse Games, nýju stúdíói skipuðu fyrrverandi Burnout-hönnuðum. Í stiklunni mátti glögglega greina Sebulba rétt í lokin, sem kveikti strax vangaveltur. Var hann aðeins skraut eða vísbending um eitthvað meira. Nú liggur svarið fyrir og það er jafn skýrt og tvöfaldur hreyfill á Tatooine.
Í viðtali við GamesRadar staðfesti forstjóri og meðstofnandi Fuse Games, Matt Webster, að podracing verði sannarlega hluti af leiknum.
„Þú getur varla búið til Star Wars-kappakstursleik án þess að hafa podracing, er það nokkuð,“
sagði Matt Webster. Hann bætti við að basic draumur leiksins væri að leyfa spilurum að stíga í spor úrvalsökumanna í Galactic League, þar sem podracing skipar algjöran toppsess þegar kemur að hraða og adrenalíni í Star Wars-heiminum.
Matt Webster útskýrði jafnframt að markmið Fuse Games hefði verið að ganga lengra en bara eina tegund farartækja. Í Galactic Racer verði lögð áhersla á fjölbreyttan flota, ólíka upplifun af hraða og mismunandi leiðir til að takast á við keppni, bæði í solo og fjölspilun. Spilarar muni fá að aka farartækjum sem þeir þekkja og elska, ásamt nýjum sem þeir hafa aldrei kynnst áður.
Til að fullkomna pakkann verður leikurinn einnig spilanlegur í fyrstu persónu, sem fyrir marga er eina rétta leiðin til að upplifa podracing á fullum hraða. Nú vantar í raun aðeins eina staðfestingu í viðbót, hvort hið goðsagnakennda Boonta Eve Classic úr Star Wars Racer’s Revenge verði í boði. Ef það smellur líka, þá verða fáir wookiear ósáttir þegar Star Wars: Galactic Racer kemur út á leikjatölvur og PC síðar á árinu.
Myndir: Steam / STAR WARS: Galactic Racer
