Alvarleg villa í Counter-Strike 2 sem gerði leikmönnum kleift að „stöðva tímann“ hefur nú verið lagfærð af Valve. Um var að ræða kerfisgalla sem leyfði spilurum að afla sér nákvæmra upplýsinga um staðsetningu og hreyfingar andstæðinga án þess að setja sig í nokkra raunverulega hættu.
Það var forritarinn Aquarius sem endurskapaði villuna og birti ítarlegt myndband á YouTube þar sem hann sýndi skref fyrir skref hvernig mætti misnota kerfið. Í myndbandinu, sem sjá má hér að neðan, sést hvernig hann virkjar tiltekna skipun, lítur fyrir horn og fær fullkomna yfirsýn yfir stöðuna án þess að sjást sjálfur.
Að því loknu snýr hann aftur á nákvæmlega sama stað og áður og getur brugðist við aðstæðum með fyrirfram fenginni vitneskju. Ítrekað má sjá hann endurtaka svokallað „peek“ með afar nákvæmum skotum, andstæðingunum algjörlega að óvörum.
Aquarius útskýrir að um hafi verið að ræða ákveðnar console-skipanir sem upphaflega voru hannaðar til að bregðast við tengivandamálum. Með þeim tókst honum að herma eftir nettengingarrofi á eigin vél. Þegar takka á lyklaborðinu var sleppt færðist persónan samstundis aftur á þann stað þar sem „tenging rofnaði“.
Með þessu móti gat hann í raun kannað aðstæður, metið stöðuna og snúið svo aftur í upphafsstellingu án þess að tapa stöðu eða lífi.
Mynd: skjáskot úr myndbandi
Villan, sem gengið hefur undir heitinu „Time Stop“, kom fyrst upp fyrir tveimur árum og var þá lagfærð. Einhver breyting í kóðagrunninum virðist þó hafa gert hana virka á ný. Aquarius birti einnig myndband af uppátækinu á X og hvatti fylgjendur sína til að dreifa efninu í þeirri von að vekja athygli Valve. Viðbrögðin létu ekki á sér standa.
Að sögn Aquarius svöruðu þróunaraðilar með einföldu en táknrænu „Give me“ GIF-i og skömmu síðar var villan leiðrétt.
Myndir: Steam / Counter Strike 2
