Samvinna við poppstjörnur og skrautleg skinn eins og þetta hafa orðið einkenni Call of Duty-leikjanna á síðustu árum. Battlefield 6 ætlar að snúa við blaðinu og halda sig við raunsæi og hermennsku.
Framleiðendur Battlefield 6 hafa lýst því yfir að nýjasti leikurinn í seríunni muni forðast skrautleg og yfirgengileg skinn sem hafa á síðustu árum einkennt keppinautinn Call of Duty.
Í viðtali við DBLTAP sagði hönnunarstjóri leiksins, Shashank Uchil, að útlit og stíll í leiknum verði jarðbundinn og í samræmi við alvarleika og andrúmsloft bardagasviðsins. Þar verði enginn rými fyrir poppstjörnur eða grínkaraktera.
„Það verður að vera jarðbundið,“
sagði Uchil í samtali við dbltap.com og bætti við að leikurinn þyrfti ekki á Nicki Minaj að halda. Þessi yfirlýsing felur í sér ákveðna afstöðu gegn þeirri þróun sem mörgum hefur þótt ýta undir yfirborðslegan og sundurlausan stíl í skotleikjum, þar sem skins virðast stundum ganga gegn eðli leiksins sjálfs.
Framleiðendurnir Alexia Christofi og David Sirland tóku í sama streng og sögðu mikilvægt að leikmenn geti tjáð persónulegan stíl, en að hann verði alltaf í takti við ramma leiksins og hlutverk hvers flokks. Ekki verður því um að ræða samvinnu við teiknimyndapersónur eða tónlistarfólk, heldur verða skinnin hönnuð með tilliti til trúverðugleika og raunsæis.
Til dæmis má reikna með að Recon-flokkurinn klæðist ghillie-fötum eða felulitun, en ekki neonlituðum búningum með glimmeráferð.
Aðdáendur seríunnar hafa tekið þessari stefnu fagnandi. Margir telja hana merki um að Battlefield sé að færa sig aftur nær sínum rótum, þar sem alvara og taktísk dýpt skiptu meira máli en tískustraumar. Þeirra á meðal eru leikmenn sem höfðu misst traust á seríunni eftir Battlefield 2042, þar sem notendaviðmót og val á útliti persóna þótti oft óviðeigandi og yfirborðskennt.
Sú gagnrýni virðist hafa skilað sér til þróunarteymisins, sem nú leggur áherslu á að virða það sem gerði seríuna að valkosti þeirra sem vilja dýpri og metnaðarfyllri bardagaupplifun.
Samt sem áður ríkir ákveðin tortryggni í hópi leikmanna. Margir velta því fyrir sér hvort Electronic Arts, útgefandi leiksins, standi við stefnuna þegar salan hefst. Reynslan hefur sýnt að fjármagn ræður oft ferðinni, og ef raunsæisleg skinn seljast ekki nógu vel getur áherslan færst aftur í átt að glansandi vitleysu.
Þrátt fyrir þetta eru fyrstu merki um stefnu Battlefield 6 skýr og leikmenn bíða nú með eftirvæntingu eftir því hvort loforðin haldist þegar leikurinn kemur út.
Sjá einnig: Battlefield 6: Útgáfudagurinn er staðfestur: 10. október 2025
Samsett mynd: callofduty.com
