Nýi sýndarveruleikaleikurinn PAYDAY: Aces High kemur út 5. nóvember næstkomandi fyrir Meta Quest og SteamVR.
Leikurinn er þróaður af sænska fyrirtækinu Fast Travel Games í samstarfi við Starbreeze Entertainment, þar sem Adolf Kristjánsson, fyrrverandi framkvæmdastjóri Tæknivals/BT á Íslandi, gegnir starfi forstjóra.
Greint er frá útgáfunni á tölvuleikjavefnum Gematsu, sem vísar í tilkynningu frá Fast Travel Games.
PAYDAY: Aces High er samstarfsleikur fyrir allt að fjóra leikmenn þar sem þeir skipuleggja og framkvæma umfangsmikil rán. Leikurinn er sérstaklega hannaður fyrir sýndarveruleika og byggir á þeirri spennu og samvinnu sem einkennt hefur PAYDAY leikjaseríuna.
Leikmenn geta meðal annars brotist inn í banka, söfn og lúxusíbúðir. Þeir þurfa að skipuleggja aðgerðirnar, velja búnað og ákveða hvort þeir ætli að fara hljóðlega að eða beita vopnavaldi.
Adolf Kristjánsson leiðir Starbreeze Entertainment
Adolf Kristjánsson tók við starfi forstjóra sænska leikjafyrirtækisins Starbreeze Entertainment 1. apríl 2025 og hefur yfir 20 ára reynslu úr alþjóðlegum tölvuleikjaiðnaði.
Samkvæmt PC Games Insider hóf Adolf störf í leikjaiðnaðinum árið 1999 sem framkvæmdastjóri Tæknivals/BT, sem annaðist meðal annars dreifingu á leikjum frá Electronic Arts á Íslandi.
Hann starfaði síðar hjá verslunarkeðjunni GAME í Svíþjóð áður en hann gekk til liðs við Electronic Arts árið 2010. Þar gegndi hann ýmsum stjórnunarstöðum og kom að verkefnum tengdum þekktum leikjaseríum á borð við FIFA, Battlefield, Apex og Star Wars.
Adolf hefur einnig setið í stjórnum leikjafyrirtækjanna Silverfox og Thunderful Group.
Sjáðu nýtt kynningarmyndband
Hér að neðan má sjá nýtt kynningarmyndband úr PAYDAY: Aces High þar sem sýnd eru helstu atriði leiksins og tilkynnt um útgáfudaginn.
Ábendingar leikmanna nýttar við þróunina
Í tilkynningu Fast Travel Games segir Adolf samstarfið við fyrirtækið hafa gengið afar vel og að þróunarteymið hafi sýnt mikla þekkingu á því hvernig færa megi PAYDAY yfir í sýndarveruleika.
Hann segir að tekist hafi að varðveita þá spennu sem einkennir leikjaseríuna, allt frá því að læðast óséður að skotmarki til þess að takast á við óvini þegar allt fer úr böndunum.
Adolf leggur jafnframt áherslu á að athugasemdir og ábendingar leikmanna úr prófunum hafi verið nýttar við þróun leiksins.
Fjórir leikmenn geta unnið saman
Í PAYDAY: Aces High geta allt að fjórir leikmenn tekið þátt í hverju ráni. Þeir geta valið úr fjölbreyttum vopnum og búnaði, meðal annars haglabyssum, skammbyssum og vélbyssum, auk sérstakra tækja sem auðvelda þeim að komast inn á lokuð svæði.
Leikmenn geta einnig þróað hæfileika sína og opnað fyrir nýjan búnað eftir því sem þeir komast lengra í leiknum.
Sérstök lokaumferð prófana hófst 19. október og stendur til 26. október. Þeir sem taka þátt fá sérstaka Kitty Mask grímu þegar leikurinn kemur út.
PAYDAY: Aces High kemur út 5. nóvember og verður seldur á 24,99 Bandaríkjadali.
Myndir: paydaythegame.com
