Gestir á EVE Fanfest 2026 fá óvenjulegt tækifæri til að leggja sitt af mörkum til verkefnisins Capsuleer Edda, þar sem saga EVE Online verður fest á blað í handskrifuðu handriti.
Hugmyndin er að varðveita sögu leikjasamfélagsins í áþreifanlegu formi. Í meira en tvo áratugi hafa leikmenn mótað heiminn New Eden með bandalögum, átökum og samvinnu. Með þessu verkefni á að safna brotum úr þeirri sögu og færa hana yfir í handrit sem getur varðveist til lengri tíma.
Í tilkynningu frá EVE Online kemur fram að á Fanfest verður gestum boðið að gefa einn blóðdropa sem verður blandaður í sérstakt blek. Framlagið er táknrænt, en hugmyndin er að samfélag leikmanna verði bókstaflega hluti af handritinu. Allir blóðdropar verða sameinaðir í eina blekblöndu og ekki verður hægt að rekja framlag til einstakra þátttakenda.
Handritið verður skrifað á pergament og með aðferðum sem eru þekktar úr hefðbundinni handritagerð. Markmiðið er að búa til verk sem endist vel og varðveitir söguna í efnislegu formi.
Textinn verður saminn af rithöfundunum Andri Snær Magnason og Jónas Reynir Gunnarsson, sem hafa rætt við leikmenn og skoðað atburði úr sögu New Eden við vinnu sína. Handritið verður síðan skrifað af faglærðum skrautritara.
Nánari upplýsingar um Capsuleer Edda verða kynntar á Fanfest, þar sem einnig verður fjallað nánar um verkið og lesnir kaflar úr því. Gestir geta skráð sig til þátttöku í verkefninu fram til 2. apríl á heimasíðu eveonline.com
