FaZe Clan eru heimsmeistarar í Rainbow Six Siege annað árið í röð eftir sigur á Team Secret í úrslitaleik Rainbow Six Invitational 2026 sem fram fór á sunnudag síðastliðinn. Með sigrinum verja þeir titilinn og festa sig enn frekar í sessi sem eitt sterkasta lið í sögu leiksins.
Þetta er í fyrsta sinn í sögu Rainbow Six Siege sem lið tekst að verja Invitational titilinn. FaZe skrifa þar með nýjan kafla í sögubækurnar og hefja tímabilið 2026 á toppi heimslistans.
HISTORY HAS BEEN FORGED🔨@FaZeEsports CLAIM THEIR SECOND HAMMER pic.twitter.com/yY5qgFNWIL
— Rainbow Six Esports (@R6esports) February 15, 2026
Úrslitaleikurinn bar þess skýr merki að FaZe voru í fantaformi. Liðið fór taplaust í gegnum úrslitakeppnina og hélt dampi alla leið í lokaeinvígið. Þeir sýndu yfirvegun bæði í sókn og vörn, náðu snemma yfirhöndinni í lotum og nýttu yfirburðastöðu af öryggi.
Fyrstu tvö borðin fóru nokkuð þægilega til FaZe, en á þriðja borðinu, Fortress, náði Team Secret að halda sér inni í einvíginu með 11–9 sigri í hörkuspennandi viðureign. Á fjórða og síðasta borðinu, Border, reyndust FaZe hins vegar sterkari og lokuðu seríunni með 10–8 sigri.
The greatest team of all time?@FaZeEsports have lifted yet ANOTHER hammer 🔨 pic.twitter.com/wLXTM0gLQW
— Rainbow Six Esports (@R6esports) February 15, 2026
Leið FaZe að titlinum var sannfærandi. Í útsláttarkeppninni lögðu þeir meðal annars Fluxo w7m, Wildcard og Team Falcons á leið sinni í úrslitin. Þeir forðuðust neðri hluta keppninnar alfarið, þó w7m hafi veitt þeim harða keppni í fjórðungsúrslitum þar sem allar þrjár viðureignir voru jafnar.
Með tveimur heimsmeistaratitlum í röð styrkir FaZe ekki aðeins eigin stöðu heldur undirstrikar áframhaldandi yfirburði Brasilíu á heimsvísu í Rainbow Six Siege. Þessi árangur setur liðið í allra efstu hillu í sögu Invitational mótsins og staðfestir að við erum mögulega að horfa á eitt besta lið allra tíma í leiknum.
Ljósmynd: Ubisoft.
