StarLadder heldur sinn glæsilega viðburð í miðri Búdapest þar sem seinni CS2 Major ársins 2025 fer fram. Áður en bestu lið heims mæta í MVM Dome, verða tveir fulltrúar íslenska esports samfélagsins þegar mættir í borgina. Icenosi og Kassi leggja af stað til Búdapest og ætla að lifa og hrærast í stemmningunni, taka áhorfendur með sér á hverju skrefi og bjóða upp á IRL-streymi daglega frá borginni, mótinu og öllu því sem gerist á bak við tjöldin.
Frá 11. til 15. desember verður strákanna að finna í beinni á twitch.tv/icenosi, þar sem þeir sýna ferðalagið, stemmninguna á götunum, viðbrögðin fyrir leikina og lífið í kringum stærsta CS2 viðburð vetrarins. Áhorfendur fá innsýn í borgina, matinn, menninguna og auðvitað Player-zone kjaftasögurnar sem enginn fréttamiðill nær. Þeir félagar fengu okkur á esports.is til liðs við sig og næstu daga birtist hér á vefnum ferðablogg, Major-dagbók, myndir og íslenskt esports-sjónarhorn á viðburðinum.
Majorinn sjálfur hófst formlega í Búdapest 24. nóvember og stendur til 14. desember. Fyrstu stig mótsins fara fram í MTK Sportpark sem tekur 2.000 manns og hentar fullkomlega til að ná áhorfendum nálægt eldlínunni. Lokaspretturinn fer síðan fram í glæsilega MVM Dome, 20.000 manna höll sem er orðin ein af tæknilega fullkomnustu esports-vettvöngum Evrópu. Þar verða Playoffs spiluð 11.–14. desember, með risavaxinni LED uppsetningu, sérhannaðri lýsingu og sviðssýn sem lofar stórsýningu.
StarLadder leggur mikla áherslu á að gera Majorinn í Búdapest að ógleymanlegum viðburði.
„Við viljum búa til upplifun sem stendur upp úr, frá fyrsta degi til úrslitaleiks,“
segir Roman Romantsov, framkvæmdastjóri StarLadder í tilkynningu. Bæjarbragur Búdapest í aðdraganda jólanna setur síðan punktinn yfir i-ið. Þetta verður stórborg í hátíðarham, skreytt og lifandi á sama tíma og bestu Counter-Strike lið heims berjast um 1,25 milljóna dollara verðlaunapott, sem samsvarar um það bil 175 milljónum króna, og einn eftirsóttasta titil rafíþróttaheims.
Íslenskir aðdáendur fá þó meira en bara úrslitin. Þeir fá Icenosi og Kassi sem sína menn á staðnum, þar sem þeir mynda brú milli mótsins og íslenska samfélagsins. Hvort sem þeir eru á leið í höllina, velta fyrir sér korti af borginni eða elta stemmninguna í kvöldmyrkrinu, verður allt tekið upp og miðlað áfram.
Ekki missa af neinu, fylgist með á www.twitch.tv/icenosi
Hype-myndbandið fyrir StarLadder Budapest Major 2025
