Leikjarýni: Run Pizza Run – Hraði, hætta og heit pizza

Hversu lengi hefur þú beðið eftir djúsí og nýbakaðri pizzu?

Í Run Pizza Run ertu kominn í hlutverk pizzusendils, sem tekst á við ekki bara hungraða viðskiptavini heldur lífshættulega borgarumferð. Leikurinn býður upp á geðveikan hraða, adrenalín og furðulega ávanabindandi upplifun – allt í þágu þess að afhenda pizzur áður en þær kólna.

Þetta er ekki bara leikur – þetta er kapphlaup við tímann, við umferðina og við sjálfan þig. Verkefnið er einfalt: hlaupa, víkja fyrir bílum sem ærast um göturnar á yfir 500 km hraða (já, þú last rétt), og koma pizzunni í hendurnar á réttum aðila áður en borgin gleypir þig. Aðstæður eru brjálæðislegar, hættur leynast á hverju horni og afhenda pizzabox er lífsreynsla út af fyrir sig.

Sem leikur sem krefst skjótleika, einbeitingar og útsjónarsemi, nær Run Pizza Run að halda manni á tánum — þó ekki endilega lengi í senn. Eftir tæplega 100 klukkustundir í leiknum get ég vottað að þetta er tryllt skemmtun, en ekki án galla.

Leikurinn er brjálæðislega hraður, með litlum möguleikum á skipulagningu eða hernaðaráætlun. Bílar þjóta framhjá á ofboðslegum hraða, springa og fljúga með látum út um allt — og ef þú ert ekki á varðbergi, þá endar þú undir einum þeirra.

Fyrsta áskorunin er að sækja pizzurnar, og síðan að finna leiðina yfir göturnar til viðskiptavina, þar sem hvert skref getur orðið þitt síðasta.

Grafíkin er einföld, jafnvel svolítið hrá, og „sensitivity“ var það lægsta sem ég gat stillt — en samt hefði mátt vera lægra. Hreyfingar pizzusendil eru of viðkvæmar, sem gerir það erfitt að stjórna hreyfingum nákvæmlega í þessu óreiðukerfi borgarinnar.

Leikurinn er fyndinn og kaótískur, þar sem uppfærslur og ný markmið halda manni við efnið — svo lengi sem þolinmæðin endist. Það má eiginlega líkja honum við Frogger á sterum – nema þú ert með pizzur og borgarstríð í kringum þig.

Run Pizza Run er ákveðin sprengja af adrenalíni, og getur veitt skammtímaskemmtun fyrir þá sem elska æsispennandi hlaupaleiki með „arcade“ fíling. Þetta er hvorki tæknilegt meistaraverk né sjónræn veisla – en sem brjálæðislegt „pick-up-and-play“ leikur er það alls ekki síðra.

Ef þú ert tilbúinn í hraða, óreiðu og pöntun númer 13 með pepperóní og hættuástandi, þá er þessi leikur kannski akkúrat fyrir þig.

Leikurinn kom út 27. febrúar í fyrra og er fáanlegur á Steam.

Ég fékk leikinn án endurgjalds.  Rýnin er byggð á minni eigin reynslu og birting hennar er án utanaðkomandi áhrifa.  Gif mynd er frá leikjahönnuði.

Myndir: skjáskot úr leiknum