Ljósleiðarinn og Rafíþróttasamband Íslands (RÍSÍ) hafa framlengt samstarfssamning sinn um áframhaldandi stuðning við efstu deild Counter-Strike á Íslandi og verður Ljósleiðarinn því áfram aðalstyrktaraðili deildarinnar sem ber nafnið Ljósleiðaradeildin.
Samstarf Ljósleiðarans og RÍSÍ hefur staðið um árabil og Ljósleiðarinn hefur stoltur átt þátt í að styðja við uppbyggingu og vöxt rafíþrótta á Íslandi.
„Við hjá Ljósleiðaranum erum afar ánægð með að halda áfram þessu öfluga samstarfi við RÍSÍ. Rafíþróttir halda áfram að vaxa hratt og eru orðnar mikilvægur hluti af afþreyingu og samfélagi ungs fólks.
Sem fyrirtæki sem byggir upp örugga innviði fyrir stafræna framtíð Íslands teljum við mikilvægt að styðja við þau samfélög sem byggja á tækni og öruggum tengingum,“
segir Þuríður Björg Guðnadóttir, framkvæmdastýra Ljósleiðarans.
Með framlengingu samningsins verður unnið að því að efla umgjörð Ljósleiðaradeildarinnar enn frekar, auka sýnileika rafíþrótta og skapa fleiri tækifæri fyrir íslenska keppendur til að þróast og vaxa innan greinarinnar.
„Við erum stolt af því að nafn Ljósleiðarans sé áfram tengt deild sem hefur orðið að mikilvægu flaggskipi rafíþrótta á Íslandi.
Við hlökkum til að taka þátt í áframhaldandi uppbyggingu deildarinnar og þeim spennandi keppnum sem framundan eru,“
bætir Þuríður við.
Jökull Jóhannsson, framkvæmdastjóri Rafíþróttasambands Íslands, segir um áframhaldandi samstarf:
„Ljósleiðarinn hefur verið lykilsamstarfsaðili RÍSÍ um árabil og gegnt mikilvægu hlutverki í uppbyggingu rafíþrótta á Íslandi. Samstarfið hefur meðal annars lagt grunn að uppbyggingu Ljósleiðaradeildarinnar sem er í dag stærsta rafíþróttadeild landsins og jafnframt stuðlað að faglegri þróun greinarinnar í heild.
Með skýrri samfélagslegri ábyrgð hefur Ljósleiðarinn lagt sitt af mörkum til að skapa fleiri tækifæri fyrir börn og ungmenni til að taka þátt í skipulögðu, uppbyggilegu og aðgengilegu rafíþróttastarfi um land allt.
Við hlökkum mikið til að halda samstarfinu áfram með Ljósleiðaranum og vinna saman að því að efla enn frekar heilbrigt og jákvætt samfélag í kringum rafíþróttir á Íslandi.“
Mynd: Rafíþróttasambands Íslands
