Á Skjálfta 2025 var ekki aðeins háð barátta í tölvuleikjunum sjálfum heldur einnig utan þeirra. Í fyrsta sinn var keppt í flokknum Besta setupið, þar sem dómnefnd lagði mat á allt frá turninum sjálfum til heildarásýndar tölvubúnaðarins, þar á meðal lyklaborð, skjá og mús. Keppnin endurspeglaði bæði listræna nálgun og vandvirkni leikmanna í búnaði sínum.
„Valið var afar erfitt og ljóst að metnaður keppenda var gífurlegur,“
sagði Jökull Jóhannsson, framkvæmdastjóri Rafíþróttasambands Íslands, í samtali við esports.is.
Að lokum stóð Nikulás Nikulásson, úr liðinu B2B í Apex Legends, uppi sem sigurvegari. Þar með tryggði hann sér titilinn fyrir besta setupið, ofan á það að vinna fyrsta sætið í Apex-keppninni sjálfri. Tvöfaldur sigur sem undirstrikar bæði leikni hans og ástríðu fyrir rafíþróttum.
Skjálfti sýnir enn og aftur að rafíþróttir snúast ekki eingöngu um úrslit í leikjum, heldur líka um stemninguna, búnaðinn og persónulegt handbragð leikmanna sem vilja skara fram úr á öllum sviðum.
Mynd: Rafíþróttasamband Íslands
