Fjölmörg ár eru liðin frá því Skjálfti var síðast haldinn, en í haust verður mótið endurvakið. Rafíþróttasamband Íslands hefur undanfarin misseri fengið fjölmargar ábendingar frá áhugafólki sem saknar opinna LAN móta í anda þeirra sem Skjálfti var þekktur fyrir.
„Rafíþróttir eru orðnar mun stærri grein en þegar Skjálftamótin voru hvað vinsælust, en í dag spilar fólk þó að mestu heima. Nú viljum við bjóða aftur upp á þann anda sem mótin höfðu,“
segir Jökull Jóhannsson, framkvæmdastjóri Rafíþróttasambands Íslands, í samtali við esports.is.
Að mótinu standa öflugir samstarfsaðilar, þar á meðal Ljósleiðarinn, Síminn, Red Bull og Ofar, sem styðja við framkvæmdina. Á dagskránni verður bæði fjölbreytt úrval móta og opið lansvæði þar sem gestir geta notið andrúmsloftsins og spilað saman á staðnum.
Skráning hefst í næstu viku, en Skjálfti fer fram í Digranesi dagana 26.–28. september. Skipuleggjendur segjast hlakka sérstaklega til að taka á móti keppendum og gestum á ný í þessu sögufræga LAN umhverfi.
Um Skjálfta
Fréttaritari esports.is hefur sjálfur upplifað mörg Skjálfta-LAN mót. Skjálfti var rótgróin mótaröð LAN-leikjamóta á Íslandi sem naut mikilla vinsælda frá lokum tíunda áratugarins og fram til ársins 2006.
Skjálfti hófst innan vébanda Símans Internet (áður Landssíminn) haustið 1998. Upphaflega var Skjálfti nafnið á leikjaþjóni Símans, skjalfti.simnet.is, sem fór í loftið 9. október 1998. Á árunum 2003–2005 náði Skjálfti hápunkti hvað umfang og vinsældir varðar. Mótin voru haldin að jafnaði fjórum sinnum á ári (yfirleitt um febrúar, vor, sumar og haust) og hvert mót laðaði að sér hundruð keppenda og gesta.
Áhrif Skjálfta á íslenskt tölvuleikjasamfélag eru óumdeilanleg. Mótaröðin skapaði heila kynslóð af metnaðarfullum leikmönnum, ruddi brautina fyrir viðurkenningu á rafíþróttum sem alvöru keppni og byggði upp innviði (t.d. leikjaþjóna og mótsfyrirkomulag) sem aðrir gátu síðar tekið við.
Hér að neðan má sjá Instagram-mynd frá CS Nostalgían, tekin á Skjálfta 3 árið 2003. Mótið fór fram helgina 22. – 24. ágúst í íþróttahúsi HK í Digranesi. Ef myndin birtist ekki mælum við með að endurhlaða síðuna.
View this post on Instagram
Logo Skjálfti: web.archive.org
