Framhald hefur orðið á baráttunni um framtíð tölvuleikja eftir að átakið Stop Killing Games var til umræðu hjá Evrópusambandinu fyrr í dag. Þar komu saman þrjár nefndir Evrópuþingsins, IMCO, JURI og PETI, til að ræða svokallað European Citizens Initiative sem miðar að því að vernda aðgengi að leikjum þegar serverar eru lokaðir.
Frumkvöðull verkefnisins, Ross Scott, og skipuleggjandinn Moritz Katzner tóku þátt í fundinum og voru ánægðir með viðbrögðin. Að þeirra sögn voru viðtökur almennt jákvæðar, bæði meðal þingmanna og fulltrúa framkvæmdastjórnar Evrópusambandsins.
Moritz sagði að nánast allir sem tjáðu sig hefðu tekið jákvætt í málið og að jafnvel gagnrýni hefði fyrst og fremst snúist um að bæta við fleiri sjónarmiðum. Scott tók í svipaðan streng og nefndi að umræðan hefði farið víðar, til dæmis yfir í kaup innan leiks, sem séu hluti af stærra samhengi leikjaiðnaðarins.
Markmiðið með yfirheyrslunni var fyrst og fremst að ýta málinu áfram í ferli lagabreytinga. Framkvæmdastjórn Evrópusambandsins er enn að fara yfir tillögurnar og hefur frest til júlí til að skila afstöðu sinni. Katzner bendir á að næsta skref gæti verið ályktun frá Evrópuþinginu sem myndi hvetja framkvæmdastjórnina til að grípa til aðgerða.
„Ég myndi segja að markmiðinu hafi verið náð í þetta skiptið,“
sagði Moritz í kjölfarið.
Þetta er ekki eina skrefið sem hefur verið tekið í vikunni. Hópurinn hefur einnig lýst yfir stuðningi við frumvarp í Kaliforníu sem myndi krefjast þess að leikjaframleiðendur tryggi að leikir haldist spilanlegir eftir að serverar eru lagðir niður, eða bjóði notendum endurgreiðslu.
Málið snertir kjarna stafrænnar eignar og framtíð leikja, og gæti haft áhrif á hvernig útgefendur og hvernig þróunaraðilar nálgast leiki sem byggja á netþjónustu á næstu árum.
Myndir: stopkillinggames.com
