CLIMB, stendur fyrir tveggja daga vinnustofu í Síðumúla 35 dagana 25. og 26. apríl. Viðburðurinn er hugsaður fyrir alla sem hafa áhuga á að þróa tölvuleiki, hvort sem fólk hefur reynslu eða er að stíga sín fyrstu skref.
Vinnustofan skiptist í tvo daga með ólíkum áherslum. Fyrri dagurinn snýst um innblástur og hugmyndavinnu, þar sem þátttakendur hlýða á erindi frá reynslumiklu fólki úr greininni og mynda teymi til að þróa leikjahugmyndir.
Seinni dagurinn fer svo í að útfæra hugmyndirnar í einfalda frumgerð og kynna niðurstöðurnar í lok dags.
Meðal fyrirlesara eru þau Melína Kolka og Rúnar Vestmann, stofnendur CLIMB, auk gestafyrirlesarans Ólafs Hrafns Steinarssonar, forstjóra Aska Studio og fyrrverandi formanns Rafíþróttasamtaka Íslands.
Viðburðurinn er opinn öllum sem hafa áhuga á leikjagerð, hvort sem það eru forritarar, hönnuðir, listamenn, tónlistarfólk eða þeir sem sitja á góðri hugmynd. Ekki er gerð krafa um reynslu, en þátttakendur þurfa að vera að minnsta kosti 20 ára. Mælt er með að mæta með fartölvu og opinn huga.
Takmarkaður fjöldi miða er í boði og skipuleggjendur hvetja áhugasama til að tryggja sér sæti tímanlega.
Myndir: Facebook / CLIMB
