esports.is Íslenska leikjasamfélagið
James „TGLTN“ Giezen (fyrir miðju) fagnar sigri með liðsfélögum sínum, Kickstart (til vinstri) og Shrimzy (til hægri).
James „TGLTN“ Giezen, 24 ára rafíþróttamaður frá Ástralíu, hefur á undanförnum árum skapað sér nafn sem einn af fremstu leikmönnum PUBG: BATTLEGROUNDS á heimsvísu. Með yfir 1.500 keppnisleiki að baki og verðlaunafé sem nálgast 900.000 bandaríkjadali sem samsvarar rúmlega 113 milljónum íslenskra króna, hefur TGLTN sýnt að hann er óumdeilanlega meðal þeirra allra bestu í greininni.
Framganga hans vakti fyrst alþjóðlega athygli árið 2021 þegar hann leiddi lið sitt, Susquehanna Soniqs, til sigurs á stórmótinu PUBG Global Invitational.S (PGI.S) sem fram fór í Suður-Kóreu. Þar tryggði liðið sér glæsilegan sigur og fékk í sinn hlut tæplega 1,3 milljónir dala (164 milljónum íslenskra króna) af heildarverðlaunapotti sem nam rúmum 7 milljónum dala (885 milljónum íslenskra króna).
Árið 2024 bætti TGLTN í safn sigra sinna þegar hann og Soniqs unnu til gullverðlauna á Esports World Cup í PUBG. Þar hlaut liðið 700.000 dali (88 milljónum íslenskra króna) í verðlaunafé, og styrkti TGLTN þar með stöðu sína sem lykilmaður í einu sigursælasta PUBG-liði heims.
Í upphafi árs 2025 skrifaði TGLTN undir hjá Team Falcons, ásamt fyrrverandi liðsfélögum sínum úr Soniqs. Þessi liðsuppstilling vakti mikla athygli í heimi rafíþrótta og markaði tímamót í sögu leikmannaskipta innan PUBG-senunnar.
Með Falcons hefur TGLTN haldið áfram að skila stórkostlegum árangri, m.a. með þriðja sæti á PUBG Global Series 7 og 8. Hann hefur jafnframt verið lykilleikmaður í ástralska landsliðinu á PUBG Nations Cup áranna 2022, 2023 og 2024, þar sem hann sýndi bæði leiðtogahæfni og yfirburðatækni.
TGLTN er þekktur fyrir yfirvegaðan leikstíl, nákvæmni og taktískan skilning. Vinsælasta vopnið hans þessa dagana er AUG, sem hann nýtir með nákvæmni langt út fyrir það sem flestir treysta sér til.
Þrátt fyrir ungan aldur hefur TGLTN þegar skilað árangri sem fáir ná á ævinni. Með áframhaldandi metnaði og stöðugleika er ljóst að framtíðin er björt fyrir þennan ástralska snilling – bæði sem einstakling og sem ómissandi hlekk í fremstu liðum PUBG-heimsins.
Myndband
Við hvetjum alla til að horfa á eftirfarandi myndband sem sýnir glöggt einstaka hæfileika hans:
Mynd: Instagram / TGLTN / Esports World Cup
