Þegar litið er yfir árið 2025 er erfitt að komast hjá því að finna fyrir ákveðinni stolti. Árið hefur verið eitt hið mest lesna og lifandi í sögu esports.is og viðtökurnar hjá lesendum staðfesta að hungur er fyrir vandað, nördalegt og staðbundið efni um rafíþróttir og tölvuleiki. Tuttugu mest lesnu fréttir ársins endurspegla það vel. Þar mætast stórar alþjóðlegar fréttir, íslenskar sögur, samfélagsleg umræða, keppni, skandalar, menning og auðvitað smá húmor þegar vel við á.
Sagan af esports.is spannar þó miklu lengra tímabil en eitt ár. Vefurinn leit dagsins ljós árið 2008 á tímum þegar íslenskt leikjasamfélag var að mestu samankomið á spjallborðum. Þá var esports.is ekki aðeins fréttavefur heldur einnig öflugt spjallsvæði sem gegndi lykilhlutverki í skipulagningu online móta og umræðu um keppni. Spjallið varð fljótt vinsælt og ekki síður umdeilt. Á þeim tíma var það jafnvel litið hornauga af stjórnendum Hugi.is sem töldu esports.is vera orðinn raunverulegur samkeppnisaðili.
Með tilkomu Facebook breyttist landslagið hratt. Spjallmenning á leikjasíðum hrundi nánast á einni nóttu og þar með lauk einnig kafla í sögu esports.is þegar spjallinu var lokað. Í kjölfarið tók við tímabil þar sem áherslan færðist alfarið yfir á fréttir. Á þeim árum starfaði stór hópur sjálfboðaliða við vefinn, oft á bilinu tuttugu til þrjátíu fréttamenn í senn, sem skrifuðu af ástríðu og áhuga án nokkurrar fjárhagslegrar umbunar. Auglýsingar voru vart til umræðu enda annað hugarfar ríkjandi á þeim tíma.
Allan þennan tíma hefur esports.is verið rekinn sem hugsjónarverkefni. Þrátt fyrir ítrekaðar fyrirspurnir um kaup á vefnum hefur hann aldrei verið til sölu. Reksturinn hefur ekki skilað hagnaði og kostnaður hefur að mestu verið greiddur úr eigin vasa ritstjóra. Það er staðreynd sem undirstrikar hversu djúp rót vefurinn á í íslensku leikjasamfélagi og hversu mikið hann byggir á eldmóði frekar en arðsemi.
Listinn yfir tuttugu mest lesnu fréttir ársins 2025 sýnir líka hvers konar efni lesendur sækjast í. Þar er allt frá alvarlegum málum eins og þjófnaði og umdeildum ákvörðunum leikjafyrirtækja yfir í keppnisfréttir, íslenskan árangur á alþjóðavettvangi, menningarviðburði á borð við Skjálfta og jafnvel aprílgabb sem náði mikilli dreifingu. Fréttir um Counter Strike, Warhammer, Marvel, skákgoðsögn í rafíþróttum og nýjar leikjaverslanir sitja hlið við hlið og mynda mynd af fjölbreyttu og síbreytilegu áhugasviði lesenda.
Að baki hverri heimsókn, hverju klikki og hverri deilingu stendur samfélag sem hefur fylgt vefnum í gegnum árin, sumir allt frá upphafi. Árið 2025 var staðfesting á því að esports.is er ekki aðeins safn frétta heldur lifandi vettvangur fyrir íslenskt leikja og rafíþróttasamfélag. Ef sagan kennir okkur eitthvað, þá er það að vefurinn hefur alltaf lagað sig að breyttum tímum án þess að glata kjarnanum. Með sama áframhaldi er óhætt að segja að næstu ár muni bæta enn fleiri köflum við þessa sögu.
Að lokum viljum við óska lesendum og landsmönnum öllum gleðilegs nýs árs og þakka kærlega fyrir góðar stundir, tryggan lestur og stuðning á árinu sem er að líða og hlökkum til að halda áfram ferðalaginu með ykkur á árinu 2026.
Hér eru tuttugu mest lesnu fréttirnar á esports.is árið 2025:
- Þjófnaður úr Arena Gaming – Skýr mynd af gerandanum til staðar
- Umdeildur tölvuleikur fjarlægður af Steam eftir alþjóðlega gagnrýni
- Klaufalegt atvik í CS2 vekur heimsathygli – Leikjahöfundur CS2 tjáir sig: „Gott að vita að einhver spilaði verr en ég“
- Íslensk CS-nostalgía í hæsta gæðaflokki: Andri Freyr heldur minningunum á lífi – Myndir og vídeó
- Cloud9 segir skilið við Mang0 eftir óviðeigandi framkomu – Hvaða ábyrgð bera stjörnur rafíþrótta?
- Skjálfti í fullum gangi – Myndaveisla
- Kínversk stúlka vísað úr skóla eftir ástarsamband við fyrrverandi atvinnumann í CS:GO
- Skráning hafin í fyrsta mót GameTíví-deildarinnar í PUBG
- Leikjaiðnaðurinn þarf ekki fleiri hvítar hetjur – Allar raddir skipta máli, líka í tölvuleikjum
- Skjálfti 2025: Dagskráin klár, stútfull helgi af leikjum, stemningu og skemmtun
- Stærsta Warhammer mótið á Íslandi til þessa, stemning og myndir
- Hvað þéna atvinnumenn í Counter-Strike?
- Neisti frá Drangsnesi með bestu treyjurnar á Skjálfta 2025
- Íslenskur sigur í Marvel-heiminum: Finnsi heimsmeistari með Virtus.Pro
- Ísland kynnir skyldunám í eSports í grunnskólum: Minecraft inngöngupróf í MS (Aprílgabb)
- Óvænt CS uppfærsla: Valve grípur til aðgerða gegn misnotkun á stigum
- Magnus Carlsen í rafíþróttir, gengur til liðs við Team Liquid
- Tollar Trump gætu hækkað verð Switch 2 um tugi þúsunda
- Ubisoft ritskoðar óvart Far Cry 4: ber brjóst hverfa úr leiknum
- VRWorld opnar á Grensásvegi í dag
