esports.is Íslenska leikjasamfélagið
Hlaðvarpið Tölvuleikjaspjallið, sem hefur vakið sífellt meiri athygli meðal áhugafólks um tölvuleiki, nálgast nú tímamót – 250 þættir eru á næsta leiti.
Frá því að fyrsti þátturinn leit dagsins ljós í júlí 2020 hafa stjórnendur hlaðvarpsins, þeir Arnór Steini og Gunnar Björnsson, tekið fyrir fjölbreytt efni tengt tölvuleikjamenningu og skapað vettvang á íslensku fyrir umræðu um leikjaiðnaðinn.
„Þó að við ræðum nýjustu leikina og rifjum upp þá gömlu, þá höfum við alltaf viljað að þetta væri meira en bara umfjöllun eða leikjadómar,“
segir Gunnar Björnsson í samtali við esports.is.
„Við köfum líka ofan í kvikmyndir byggðar á tölvuleikjum, helstu fréttir, tölvuleikjaframleiðendur og fáum gesti úr greininni til að deila sinni sýn.“
Að sögn Gunnars Björnssonar hefur markmiðið frá upphafi verið að höfða til breiðs hóps – hvort sem hlustendur eru kasúal spilara, alvöru keppnismenn eða einhvers staðar þar á milli.
„Sama hvort þú ert með 600 tíma í League of Legends, keppir í Counter-Strike eða spilar Stardew Valley á kvöldin – þá erum við með eitthvað fyrir þig.“
Tölvuleikjaspjallið hefur fest sig í sessi sem eitt öflugasta hlaðvarp landsins á sviði leikjamenningar.
Hér fyrir neðan má finna nýjasta þáttinn frá þeim félögum, en nýr þáttur birtist í hverri viku og er aðgengilegur á öllum helstu hlaðvarpsveitum.
