Mánudaginn 25. nóvember mun Rafíþróttadeild Fylkis halda kynningarfund í nýrri aðstöðu sinni í Fylkisselinu, Norðlingabraut 12, þar sem Fimleika- og karatedeildir Fylkis eru einnig til húsa.
Í fréttatilkynningu segir að kynnt verður hvað rafíþróttir eru og hvernig starfsemi Rafíþróttadeildarinnar verður háttað.
Deildin verður með barna- og unglingastarf og stefnir að því að nýta tölvuleikjaspilun á jákvæðan, heilbrigðan og uppbyggjandi hátt og bæta samskipti milli foreldra og barna hvað varðar rafíþróttaiðkun. Eitt aðalmarkmið deildarinnar er að koma í veg fyrir félagslega einangrun krakka sem leita í tölvuleiki og virkja þau félagslega í ungmennastarfi Fylkis.
Deildin mun bjóða upp á æfingar í öllum helstu rafíþróttagreinum. Sem dæmi má nefna Fortnite, FIFA, Counter-Strike, Overwatch og League of Legends.
Þriðjungur hverrar æfingar verður varið í líkamlega- og andlega uppbyggingu áður en setist er í tölvurnar. Æft verður tvisvar í viku í hverri grein, níutíu mínútur í senn. Æfingarnar verða aldursskiptar, annars vegar æfa krakkar í 5.-7. bekk saman og hins vegar þau sem eru í 8-.10. bekk.
Dagskrá
Arnar Hólm – Kl: 20:00 – 20:40
Arnar Hólm, eigandi Rafíþróttaskólans, netveru.is og fræðslustjóri Rafíþróttasamtaka Íslands, hefur víðtæka reynslu af skipulögðu starfi fyrir börn og ungmenni og mun halda fyrirlestur um hvernig hægt er að iðka rafíþróttir á heilbrigðan máta með skipulagðri starfsemi.
Aron Ólafsson – Kl: 20:40-21:00
Aron Ólafsson formaður Rafíþróttadeildar Fylkis hefur starfað fyrir breskt rafíþróttafélag og verið í fremstu röð á Íslandi í rafíþróttum. Hann hefur haldið fyrirlestra um rafíþróttir og hvernig hægt er að stuðla að heilbrigðum lífstíl samhliða því að vera afreksmaður í rafíþróttum og mun kynna uppbygginguna á starfi deildarinnar og kynna fyrir foreldrum hverjar áherslur Fylkis verða þegar kemur að þjálfun.
Opið hús og spjall – Kl: 21:00-21:30
Opið hús í æfingarrými deildarinnar frá 21:00-21:30 þar sem hægt verður að spjalla við leikmenn meistaraflokka liðsins í Counter-Strike og League of Legends.
Markmið deildarinnar eru:
- Að bjóða upp á skipulagt starf fyrir börn og unglinga þar sem þau geta stundað rafíþróttir undir handleiðslu þjálfara.
- Að stuðla að jákvæðri tölvuupplifun.
- Að hjálpa iðkendum að hugsa vel um líkama og sál.
- Að efla félagslegan og siðferðilegan þroska.
- Að iðkendur læri undirstöðuatriði í þeim leik sem það æfir.
- Að iðkendur hafi ánægju af rafíþróttum.
- Að búa til atvinnufólk í faginu sem leyfa ekki tölvum að stjórna lífinu sínu.
- Að efla félagsfærni og valdefla þau sem eru mikið ein heima að spila.
- Að búa til félagsmenn.
- Að vera með öflugt meistaraflokkastarf.
Mynd: facebook / Rafíþróttadeild Fylkis
